کورونا وائرس کیسز کی تعداد میں اضافے کا خدشہ، 2ہزار سے زائد پاکستانی بیرون ملک سے پاکستان پہنچیں گے

کوئٹہ (اردوپوائنٹ تازہ ترین اخبار-22مارچ2020ء) کورونا وائرس کیسز کی تعداد میں اضافے کا خدشہ پیدا ہوگیا ہے۔ بلوچستان حکومت کے اگلے چند روز میں مطابق 2ہزار سے زائد پاکستانی بیرون ملک سے پاکستان پہنچیں گے۔ چیف سیکریٹری بلوچستان کیپٹن (ر) فضل اصغر کے مطابق چند دنوں میں تقریباً 2 ہزار زائرین و دیگر ایران سے تفتان بارڈر کے راستے وطن واپس آئیں گے۔

انہوں نے مزید بتایا ہے کہ تفتان میں 500 سے زائد افراد کو قرنطینہ رکھا گیا ہے جبکہ بلوچستان میں کورونا وائرس کے مریضوں کی تعداد 104 ہوگئی ہے۔ انہوں نے کہا کہ تمام متاثرہ افراد کو شیخ زید اور فاطمہ جناح کے ہسپتالوں میں قائم تنہائی وارڈ میں رکھا گیا۔ کیپٹن (ر) فضل اصغر نے کہا کہ کوئٹہ میں 50 ایکڑ اراضی پر 2 ہزار افراد کی گنجائش والے ہنگامی صحت مرکز کے قیام کا کام شروع کردیا گیا ہے۔

(جاری ہے)

انہوں نے کہا کہ نیشنل ڈیزاسٹر منیجمنٹ اتھارٹی تفتان اور چمن کے لیے بالترتیب 600 اور 300 کنٹینرز فراہم کرے گی جو تمام رہائشی سہولیات سے لیس ہوں گے۔ چیف سیکریٹری نے کہا کہ بلوچستان میں کوئی لاک ڈاؤن نہیں ہے، صرف بین الصوبہ اور بین شہروں کی آمدورفت معطل کردی گئی ہے اور شاپنگ مالز اور بازار بند کردیئے گئے ہیں۔چیف سیکریٹری بلوچستان نے کہا کہ ہم ضروری طبی آلات اور دوائیں خرید رہے ہیں اور مریضوں کے لیے ایک بستر اور باتھ روم پر مشتمل ایک کمرے کا سیٹ تیار کر رہے ہیں۔

کیپٹن (ر) فضل اصغر نے کہا کہ اس وقت ہمارے پاس 450 سے زائد مریضوں کے علاج معالجے کی سہولت موجود ہے لیکن ہم مزید سازوسامان بھی خرید رہے ہیں۔ صوبائی چیف سیکریٹری نے مزید کہا کہ اس وقت اسکولوں اور کالجوں میں قرنطینہ سنٹر قائم نہیں کیے جارہے، رورل ڈیولپمنٹ اتھارٹی، پاکستان کونسل آف سائنسی ریسرچ اور تفتان میں قرنطینہ سینٹر قائم کیے گئے ہیں۔