طیارہ حادثے میں جھلسنے والی 12 سالہ گھریلو ملازمہ ہسپتال میں چل بسی، ایک کی حالت تشویشناک

کراچی(اُردو پوائنٹ اخبارتازہ ترین - این این آئی۔ 01 جون2020ء) کراچی کے علاقے ماڈل کالونی میں پی آئی اے طیارہ حادثہ میں جھلسنے والی 12 سالہ گھریلو ملازمہ ہسپتال میں چل بسی ،دو ساتھی لڑکیوں میں سے مزید ایک کی حالت تشویشناک ہے۔ہسپتال ذرائع کے مطابق 12 سالہ ناہیدہ کو 22 مئی کو طیارہ حادثے کے بعد جناح اسپتال سے سول ہسپتال کے برنس سنٹر منتقل کیا گیا تھا، ناہیدہ طیارہ حادثے میں 56 فیصد جھلس گئی تھی۔

پولیس کے مطابق کراچی کے علاقے ماڈل کالونی میں طیارہ گرنے سے تباہ ہونے والے گھروں میں کام کرنے والی تین گھریلو ملازم لڑکیاں بھی جھلس گئی تھیں۔شاہ لطیف ٹاؤن تھانے کی حدود ملیر جام کھنڈو گوٹھ کے خاصخیلی محلے سے تعلق رکھنے والی ناہیدہ، عزیزہ اور ماریہ خاصخیلی ماڈل کالونی کے ان گھروں جزوقتی کام کرتی تھیں جن پر پی آئی اے کا طیارہ گر کر تباہ ہوا تھا۔

(جاری ہے)

طیارہ گرتے ہی ماڈل کالونی کے کئی گھروں کو بھی آگ لگ گئی تھی جس کے نتیجے میں اس آبادی کے کافی لوگ زخمی ہوئے ان میں یہ تینوں گھریلو ملازمائیں بھی شامل تھیں۔یہ لڑکیاں دیگر خواتین کے ساتھ گھروں میں کام کرنے کے لیے گوٹھ سے صبح سویرے جاتی اور شام کو واپس لوٹ آتی تھیں۔وقوعہ کے روز 2 بجے دو لڑکیوں نے کام ختم کر لیا تھا اور وہ گلی میں چارپائی پر بیٹھ کر تیسری لڑکی کا انتظار کر رہی تھیں کہ طیارہ آگرا، ان کی عزیز خاتون رشیدہ کے مطابق تینوں لڑکیوں کو فوری طور پر دیگر زخمیوں کے ساتھ جناح ہسپتال لے جایا گیا تھا جہاں سے انہیں سول ہسپتال کے برنس سینٹر منتقل کر دیا گیا تھا۔

ڈاکٹرز کے مطابق دو میں سے مزید لڑکی کی حالت انتہائی تشویشناک ہے، 12 سالہ ناہیدہ اسکول پڑھ رہی تھی عید کے اخراجات کے لیے گھروں میں کام کرنے جانے لگی تھی کہ موت کا شکار ہوگئی۔