ایمرٹس ائیرلائن نے پاکستان کیلئے خصوصی پروازیں جاری رکھنے کا اعلان کردیا

متحدہ عرب امارات میں موجود پاکستانیوں کو وطن واپس لے جانے والی خصوصی فلائٹس اور کارگو فلائٹس کا آپریشن جاری رہے گا، ایمرٹس ائیرلائن

عثمان خادم کمبوہ بدھ 24 جون 2020 22:36

دُبئی(اُردو پوائنٹ تازہ ترین اخبار۔24جون 2020ء) ایمرٹس ائیرلائن نے پاکستان کیلئے خصوصی پروازیں جاری رکھنے کا اعلان کردیا ہے۔ ایمرٹس ائیرلائن نے بتایا ہے کہ متحدہ عرب امارات میں موجود پاکستانیوں کو وطن واپس لے جانے والی خصوصی فلائٹس اور کارگو فلائٹس کا آپریشن جاری رہے گا۔ اس سے قبل گزشتہ روز ائیرلائن نے اعلان کیا تھا کہ کمپنی پاکستان کیلئے فلائٹ آپریشن معطل کر رہی ہے اور یہ فیصلہ غیر معینہ مدت تک کیلئے کیا گیا تھا۔

تاہم اب ائیرلائن کی جانب سے کہا گیا ہے کہ پاکستان کیلئے کارگو فلائٹس اور خصوصی پروازیں جاری رکھی جائیں گی۔ ائیرلائن نے بتایا ہے کہ خصوصی پروازیں اعلان کردہ شیڈیول کے مطابق ہی چلتی رہیں گی۔ گزشتہ روز اماراتی ائیرلائن نے کورونا وبا کے پھلاؤ پر قابو پانے کیلئے پاکستان کیلئے فضائی سفر تاحکم ثانی معطل کرنے کا اعلان کیا تھا۔

(جاری ہے)

ایک صارف نے ٹویٹر پر اماراتی ائیرلائن سے سوال کیا تھا کہ کیا ائیرلائن نے 23جون سے 3جولائی تک پاکستان کیلئے فضائی آپریشن معطل کردیا ہے تو اس پر فضائی کمپنی نے تصدیق کرتے ہوئے بتایا تھا کہ ائیرلائن نے کورونا وبا کے پھلاؤ پر قابو پانے کیلئے پاکستان کیلئے فضائی سفر تاحکم ثانی معطل کردیا ہے۔

انہوں نے مزید کہا کہ وہ حالات کا باغور جائزہ لے رہے ہیں اور جیسے ہی حالات اجازت دیں گے تو فضائی آپریشن بحال کردیا جائے گا۔ذرائع کے مطابق یہ فیصلہ پاکستان سے امارات جانے والے 26 افراد میں کرونا وائرس کی تشخیص کے بعد لیا گیا ہے. اماراتی حکومت کی اجازت ملنے تک دونوں ممالک کے درمیان ایمرٹس کی پروازیں معطل رہیں گی۔ ائیرلائن نے مزید کہا ہے کہ جیسے ہی سروس بحال ہوگی تو اسکا اعلان کردیا جائے گا۔

ذرائع نے بتایا ہے کہ جن افراد میں کورونا کی تشخیص ہوئی وہ پاکستان سے متحدہ عرب امارات اور وہاں سے ہانگ کانگ گئے تھے۔ تمام افراد میں وائرس کی تشخیص ہانگ کانگ میں ہوئی۔ اب ائیرلائن نے امارات میں پھنسے پاکستانیوں کو اچھی خبر دی ہے کہ خصوصی پروازیں جاری رہیں گی۔ خیال رہے کہ متحدہ عرب امارات میں اس وقت ہزاروں پاکستانی موجود ہیں جو کہ اپنے ملک واپس آنا چاہتے ہیں۔ کئی پاکستانی ایسے ہیں جو روزگار نہ ہونے کے باعث مشکل حالات کا شکار ہیں جبکہ باقی لوگ بھی کورونا کی وجہ سے پیدا ہونے والے مشکل حالات میں اپنے پیاروں کے پاس لوٹنا چاہتے ہیں۔