اضافی فیس وصولی کیس، سی ای او ایجوکیشن رپورٹ سمیت عدالت میں پیش، مزید سماعت 13 جولائی تک ملتوی

لاہور (اُردو پوائنٹ اخبارتازہ ترین - اے پی پی۔ 06 جولائی2020ء) لاہور ہائیکورٹ میں پرائیویٹ سکولز میں اضافی فیسوں کی وصولی پر توہین عدالت کی درخواست پر سی ای او ایجوکیشن زاہد پرویز اختر رپورٹ سمیت پیش ہوئے اور عدالت کو بتایا کہ پرائیویٹ سکولز میں پانچ فیصد سے زائدفیسوں میں اضافے منسوخ کر دیئے گئے ہیں۔ڈسٹرکٹ رجسٹریشن اتھارٹی کے فیصلے بارے سی ای او ایجوکیشن نے عدالت کو آگاہ کیاکہ4ہزار سے زائد فیس پر سکولز ازسر نو واؤچر جاری کریں گے، 5 فیصد سے بڑھا کر 8 فیصد اضافہ کرنے کا نوٹیفیکیشن واپس لے لیا گیا ہے۔

عدالت نے کیس کی مزید سماعت ملتوی کرتے ہوئے 13 جولائی کو فریقین کے وکلا ء کو مزید دلائل کیلئے طلب کرلیا۔جسٹس ساجد محمود سیٹھی نے ندا اسلم، الطاف احمد سمیت دیگر طلباء کی درخواست پر سماعت کی۔

(جاری ہے)

درخواست گزاروں کی طرف سے صفدر شاہین پیرزادہ ایڈووکیٹ پیش ہوئے۔درخواست میں سیکرٹری سکول ایجوکیشن، کمشنر لاہور، ایل جی ایس اور بیکن ہائوس سکول مالکان سمیت دیگر کو فریق بنایا گیاہے۔

درخواست گزار وں کے وکیل صفدر شاہین پیرزادہ نے موقف اختیار کیا کہ پرائیویٹ سکول مالکان نے طلباء کو 8 فیصد اضافی فیس کے وائوچر جاری کئے ہیں۔ سپریم کورٹ نے 5 فیصد فیصد اضافے کی اجازت دی تھی۔ سکول مالکان نے فیس جمع نہ کروانے کی صورت میں آن لائن کلاسز کیلئے پورٹل بند کرنے کا کہا جا رہا ہے۔ نوٹس میں اضافی فیس کی عدم ادائیگی کی صورت میں اگلی کلاسز میں ترقی نہ دینے کی بھی تنبیہ کی گئی ہے۔ ڈسٹرکٹ ریگولیٹری اتھارٹی بھی پرائیویٹ سکولوں کو طلباء سے 5 فیصد اضافی فیس وصولی کے نوٹس جاری کر چکی ہے۔ عدالت سے استدعا کی گئی ہے کہ سپریم کورٹ کے فیصلے کی خلاف ورزی کرنے پر سیکرٹری سکول اور سکول مالکان کیخلاف توہین عدالت کی کارروائی کی جائے۔