بھارت نے پاکستان کے خلاف جارحیت کی تو پاک فوج کے شانہ بشانہ کھڑے ہونگے ، مرکزی تنظیم آرائیاں پاکستان

حیدرآباد(اُردو پوائنٹ اخبارتازہ ترین - این این آئی۔ 14 اگست2020ء) بھارت نے پاکستان کے خلاف جارحیت کی تو پاک فوج کے شانہ بشانہ کھڑے ہونگے اور وقت پڑنے پر پاکستان کے لئے تن من دھن قربان دیں گے، پاک فوج کا بھارت کو جارحیت پر بھرپور جواب دینے کا عزم حوصلہ افزاء ہے، مرکزی تنظیم آرائیاں پاکستان کے سرپرست اعلی عبدالمجید آرائیں اور مرکزی صدر چوہدری محمد جمیل آرائیں کی جانب سے یوم آزادی پاکستان بھرپور اورجوش و خروش سے منانے کی ہدایت پر حیدرآباد ڈویژن کے زیر اہتما م مرکزی چیف آرگنائز ر محمد صفدر آرائیں کی زیر قیادت میں آرائیں ڈیرہ گلشن زیل پاک سوسائٹی سے یوم آزادی ریلی کا انعقاد کیا گیا، ریلی شہر کی مختلف شاہراہوں پر گشت کرتی ہوئی حیدرآباد پریس کلب کے سامنے اختتام پذیر ہوئی، ریلی کے شرکاء نے پاکستان کے حق میں اور کشمیر بنے گا پاکستان کے پر جوش نعرے بازی کی، اس موقع پر پریس کلب کے سامنے آزادی کیک کاٹا گیا، رہنماؤں نے خطاب کرتے ہوئے کہا کہ ہندوستان نے پاکستان کے خلاف جارحیت کی تو پاک فوج کے شانہ بشانہ کھڑے ہوں گے اور وقت پڑنے پر پاکستان کے لئے تن من دھن قربان دیں گے، پاک فوج کا بھارت کو جارحیت پر بھرپور جواب دینے کا عزم حوصلہ افزاء ہے، ریلی میں حیدرآباد ڈویژن کے جنرل سیکریٹری شاہد محمود آرائیں، ضلع حیدرآباد کے صدر حاجی نذیر احمد آرائیں، پروفیسر عبدالغفور غفور آرائیں سمیت دیگر بھی موجود تھے۔