کورونا وائرس کیسز کی سب سے زیادہ شرح کراچی میں ہے، وزار ت صحت نے اعدادو شمار جاری کر دیئے

جمعہ 4 دسمبر 2020 20:11

اسلام آباد (اُردو پوائنٹ اخبارتازہ ترین - این این آئی۔ 04 دسمبر2020ء) وزارت صحت نے کہا ہے کہ کورونا وائرس کے کیسز کے مثبت آنے کی سب سے زیادہ شرح کراچی میں ہے، جس کے باعث ملک بھر میں کراچی کورونا وائرس کے کیسز میں پہلے نمبر پر آگیا۔وزارت صحت نے گزشتہ چوبیس گھنٹوں میں ملک میں کورونا وائرس کے کیسز کے مثبت آنے کی شرح پیش کردی۔وزرات صحت ک مطابق کراچی میں کورونا کیسز مثبت آنے کی شرح 20.12 فیصد ریکارڈ ہوئی۔

(جاری ہے)

ایک ہفتے قبل کراچی 12.63 فیصد کے ساتھ ملک میں پانچویں نمبر پر تھا، دوسرے نمبر پر حیدرآباد میں کورونا کے سب سے زیادہ کیسز ہیں۔وزارت صحت کے مطابق حیدرآباد میں کورونا وائرس کے کیسز مثبت آنے کی شرح 18.43 فیصد ریکارڈ ہوئی۔ ایبٹ آباد میں کورونا کے مثبت کیسز کی شرح 14.53 فیصد ریکارڈ ہوئی،سب سے کم شرح گوجرانوالہ میں 0.59 فیصد ریکارڈ کی گئی۔ وزارت صحت کے مطابق اسلام آباد میں کورونا وائرس کے کیسز مثبت آنے کی شرح 6.61، کوئٹہ میں 9.91 فیصد ریکارڈ ہوئی اور لاہور میں کورونا کیسز مثبت آنے کی شرح 5.69 فیصد ریکارڈ کی گئی۔