اٹلی پاکستان میں تجارتی پارٹنرشپ سے ملکی برآمدات میں اضافہ ہوگا ،خادم حسین

لاہور (اُردو پوائنٹ اخبارتازہ ترین - آن لائن۔ 20 جنوری2021ء) تاجر رہنما و پاکستان سٹون ڈویلپمنٹ کمپنی کے بور ڈ آف ڈائریکٹرز کے رکن خادم حسین سینئر نائب صدر فیروز پور بورڈ و ایگزیکٹو ممبرلاہور چیمبرز آف کامرس نے کہا ہے کہ اٹلی پاکستان میں تجارتی پارٹنر شپ سے ملکی برآمدات میں اضافہ ہوگا انہوںنے پاکستان میں اٹلی کے سفیر اینڈریاس فرارز کی طرف سے اٹلی اور پاکستان کے باہمی تجارت 5ارب ڈالر تک بڑھانے کی گنجائش کو مثبت قرار دیتے ہوئے کہا ہے کہ اٹلی کی معیشت مضبوط ہے اور سرمایہ کاری وسیع مواقع ہیں جن سے پاکستانی سرمایہ کار فائدہ اٹھائیں تعمیرات اور زراعت کے شعبوں میں مشترکہ منصوبہ سازی کی وسیع گنجائش ہے انہوںنے کہا کہ ماربل انڈسٹری میں اٹلی کے تجربہ سے ملکی ماربل انڈسٹریز ترقی کرے گی او ر ماربل کی بیرون ملک برآمدات سے کثیر زرمبادلہ کمایا جاسکتا ہے۔

(جاری ہے)

ان خیالات کااظہار انہوںنے فیروز پور بورڈ کے تاجروں کے وفد سے گفتگو کرتے ہوئے کیا۔ انہوںنے اٹلی کے سفیر کے اس اعلان کو خوش آئند قرار دیا ہے کہ پاکستانی تاجروں کو 3سی5 سال کے ویزے جاری کیے جائیں گی جس سے باہمی تجارت بڑھانے میں مدد ملے گی۔خادم حسین نے کہا کہ اٹلی کے ساتھ توانائی، سٹیل، کیمیکلز ،مائننگ اور دیگر بہت سے شعبوں میں کام سے ملک میں خوشحالی و ترقی آئے گی کیونکہ اٹلی سو فیصد توانائی متبادل ذرائع سے پیدا کررہا ہے انہوںنے کہا کہ اٹلی سے تجارتی سرگرمیوں میں اضافہ سے ملکی برآمدا ت اور زرمبادلہ کے ذخائر میں اضافہ ہوگا اور ملک خوشحالی و ترقی کی راہوں پر گامزن ہوگا