سینیٹ انتخابات میں نقب لگانے کی واردات کو جمہوریت کی فتح قراردینا شرمناک ہے‘ہمایوں اخترخان

پیپلزپارٹی کی پیروی میں چلنے کی وجہ سے مسلم لیگ (ن) کے سنجیدہ رہنما شدید تشویش میں مبتلاہیں ‘سینئر مرکزی رہنماء

ہفتہ مارچ 11:40

سینیٹ انتخابات میں نقب لگانے کی واردات کو جمہوریت کی فتح قراردینا شرمناک ..
اسلام آباد(اُردو پوائنٹ اخبارتازہ ترین - این این آئی۔ 06 مارچ2021ء) پاکستان تحریک انصاف کے سینئر مرکزی رہنماوسابق وفاقی وزیر ہمایوں اخترخان نے کہا ہے کہ مسلم لیگ (ن) نے مبینہ طو رپر جن لوگوں کو آئندہ عام انتخابات میں ٹکٹ دینے کی یقین دہانی کرائی ہے وقت آنے پر ان کیلئے ’’رات گئی بات گئی ‘‘ والافارمولہ اپنائے گی ،پی ڈی ایم سینیٹ انتخابات میں نقب لگانے کی واردات کو جمہوریت کی فتح قراردے رہی ہے جو شرمناک بات ہے ،پیپلزپارٹی کی پیروی میں چلنے کی وجہ سے مسلم لیگ (ن) کے سنجیدہ رہنما شدید تشویش میں مبتلاہیں ۔

اپنے ایک بیان میں ہمایوں اخترخان نے کہا کہ سینیٹ کے انتخابات میں جمہوری اقدار کے ساتھ کھلواڑ کیا گیا اورپوری قوم نے سب کچھ اپنی آنکھوںسے دیکھاہے ۔انہوںنے کہا کہ جن لوگوںنے سینیٹ انتخابات میں مخالفت میں ووٹ دیا انہیںچاہیے تھاکہ سامنے آ کراظہارکرتے اوراس کے ساتھ یہ اعلان بھی کرتے کہ ہم پارٹی کی نشست چھوڑ کردوبارہ انتخاب لڑ کر میدان میں آئیں گے،ایسے لوگ یقینا بے نقاب ہوں گے ۔

(جاری ہے)

انہوںنے کہا کہ مبینہ طور پر مسلم لیگ(ن) نے جن لوگوں کو ٹکٹ کی یقین دہانی کرائی ہے وقت آنے پر لیگی قیادت ان کا فون بھی نہیں سنے گی اور ان کیلئے ’’ رات گئی بات گئی ‘‘ والافارمولہ اپنایا جائے گا۔ ہمایوں اختر خان نے کہا کہ وزیر اعظم عمران خان نے اپنے عزم کی وجہ سے ملک کو مشکل حالات سے باہر نکالا ہے اسی لئے اپوزیشن آگے بڑھتے ہوئے پاکستان کی راہ میں سپیڈ بریکر بنا رہی ہے لیکن انہیں سوائے ناکامی کے کچھ حاصل نہیں ہوگا۔