شہر قائد سے حوالہ ہنڈی کا ایک اور بڑا نیٹ ورک بے نقاب، 3 افراد کو گرفتار کر لیا گیا

نیٹ ورک سے جڑے بے نامی اکاؤنٹس، خفیہ سافٹ ویئر، انٹر نیشنل ایجنٹس کے نام بھی سامنے آ گئے

Sumaira Faqir Hussain سمیرا فقیرحسین جمعہ 16 اپریل 2021 12:17

شہر قائد سے حوالہ ہنڈی کا ایک اور بڑا نیٹ ورک بے نقاب، 3 افراد کو گرفتار ..
کراچی (اُردو پوائنٹ تازہ ترین اخبار۔ 16 اپریل 2021ء) : ایف آئی اے نے شہر قائد سے آپریٹ کیے جانے والے حوالہ ہنڈی کے ایک اور بڑے نیٹ ورک کو بے نقاب کر دیا۔ تفصیلات کے مطابق ایف آئی اے کارپوریٹ کرائم سرکل نے 14 شہروں میں پھیلے نیٹ ورک کا سراغ لگا لیا جبکہ نیٹ ورک سے جڑے بے نامی اکاؤنٹس، خفیہ سافٹ ویئر، انٹر نیشنل ایجنٹس کے نام بھی سامنے آ گئے۔ ایف آئی اے کرائم سرکل کے مطابق پکڑا گیا نیٹ ورک قمبر، شہداد کوٹ، لاڑکانہ، رتو ڈیرو، نواب شاہ،گمبٹ، خضدار مورو تک پھیلا ہوا ہے، جب کہ یہ نیٹ ورک کراچی سے آپریٹ کیا جا رہا تھا، ایف آئی اے کارپوریٹ کرائم سرکل نے تمام ایجنٹوں کے نام بھی حاصل کر لیے۔

یہ گروہ کراچی سے حوالہ ہنڈی میں ملوث ملزم عبدالفتح کے نیٹ ورک کا حصہ ہے، عبدالفتح سمیت دیگر ملزمان جاوید اور لطیف ڈینو کو داؤد پوتہ روڈ پر کارروائی کرتے ہوئے گرفتار کیا گیا۔

(جاری ہے)

میڈیا رپورٹ میں بتایا گیا کہ ایف آئی اے کرائم سرکل نے 2020 سے 2021 تک حوالہ ہنڈی کے ٹرانزیکشنز کی تفصیلات بھی حاصل کر لی ہے۔ بینکوں میں جمع کروائی گئی رقم کی تفصیلات بھی مل گئیں، ادارے کے مطابق نیٹ ورک حوالہ ہنڈی کا کام درہم میں کیا کرتا تھا، نیٹ ورک سے جڑے ایجنٹ دبئی سے بھی اسے آپریٹ کر رہے ہیں۔

ایف آئی اے تحقیقات میں گروپ کے دھندے سے جڑے کئی کمپنیوں کے نام سامنے آئے ہیں، حوالہ ہنڈی سے منسلک گروہ الگ سوفٹ ویئر استعمال کرتا تھا، ایف آئی اے نے اس سوفٹ ویئر کی تفصیلات بھی حاصل کر لیں۔ گروہ کے حوالہ ہنڈی سے منسلک کارندوں کے کئی بے نامی اکاؤنٹس بھی سامنے آ گئے ہیں، ایف آئی اے کارپوریٹ کرائم سرکل نے تمام ملزمان کے خلاف مقدمہ درج کر لیا گیا ہے جن سے مزید تفتیش کی جائے گی۔   

متعلقہ عنوان :