نیویارک (اُردو پوائنٹ اخبارتازہ ترین - این این آئی۔ 16 جون2021ء)
امریکی صدر جو بائیڈن نے پاکستانی نژاد پروفیسر اور بگ ٹیک کی متحرک ناقد لینا خان کو فیڈرل ٹریڈ کمیشن کی سربراہ مقرر کردیا
۔امریکی میڈیا رپورٹ کے مطابق
امریکی صدر نے لینا خان کو ایسے وقت میں سربراہ مقرر کیا ہے جب
ٹیکنالوجی کی صنعت کو کانگریس، ریگولیٹرز اور ریاستی اٹارنی جنرلز کے شدید دباؤ کا سامنا ہے۔
فیڈرل ٹریڈ کمیشن(ایف ٹی سی) کی سربراہی کے لیے پاکستانی نڑاد لیگل اسکالر لینا خان کے انتخاب کو ٹیک جائنٹس
فیس بک، گوگل، ایمازون اور ایپل کے ایک سخت مؤقف کے عندیے کے طور پر دیکھا جارہا ہے۔وہ پانچ رکنی فیڈرل ٹریڈ کمیشن کا حصہ ہیں اور ان کی حمایت میں 69 اور مخالفت میں 28
ووٹ کے بعد
سینیٹ کی جانب سے لینا خان کے تقرر کی تصدیق کی گئی جس کے چند گھنٹے بعد بعد انہوں نے ایف ٹی سی کی سربراہ کے عہدے کا حلف لیا۔
(جاری ہے)
نیویارک ٹائمز کے مطابق لینا خان لندن میں ایک پاکستانی خاندان میں پیدا ہوئی تھیں اور جب وہ 11 برس کی ہوئیں تو ان کے والدین امریکا ہجرت کرگئے تھے۔لینا خان کولمبیا یونیورسٹی کے اسکول آف لا میں ایک پروفیسر ہیں اور ییل لا اسکول کی
طالبہ کی حیثیت سے انہوں نے ایمازون اینٹی ٹرسٹ پیراڈاکس کے عنوان سے ایک تحقیقی مقالہ لکھا تھا جسے بہت زیادہ سراہا گیا تھا۔
انہوں نے کنزیومر پرائسز پر بڑی کمپنیوں کی اجارہ داری کے اثرات کے تناظر میں اجارہ داریوں کو کنٹرول کرنے کے قوانین (اینٹی ٹرسٹ لا) کو ایک نئے انداز سے دیکھنے کی بنیاد رکھنے میں مدد دی۔سال 2019 اور 2020 میں
امریکی کانگریس کی ہاؤس جوڈیشل کمیٹی کی وکیل کی حیثیت سے انہوں نے مارکیٹ میں دیوہیکل
ٹیکنالوجی کمپینوں کی طاقت سے متعلق دو طرفہ تحقیقات میں کلیدی کردار ادا کیا۔
32 سالہ لینا خان ایف ٹی سی کی تاریخ کی سب سے کم عمر سربراہ بن گئی ہیں جو عام طور پر انڈسٹری میں مقابلے اور صارفین کے تحفظ کے ساتھ ساتھ ڈیجیٹل پرائیویسی پر بھی پالیسی سازی کریں گی۔سینیٹر الزبتھ وارن نے ایک بیان میں کہا کہ لینا کے پاس اس کردار کے لیے وسیع علم اور مہارت ہے اور وہ صارفین کے لیے ایک نڈر چمپئن بنیں گی۔لینا خان، ایف ٹی سی کمشنر روہت چوپڑا کی قانونی مشیر بھی تھیں اور ماضی میں اوپن مارکیٹس انسٹیٹیوٹ میں قانونی ڈائریکٹر بھی رہ چکی ہیں۔
ایف ٹی سی کی سربراہ منتخب ہونے پر لینا خان نے اپنی ایک ٹوئٹ میں کہا کہ 'صدر جو بائیڈن کی جانب سے فیڈرل ٹریڈ کمیشن کی سربراہ منتخب ہونا ایک بڑا اعزاز ہے۔انہوں نے کہا کہ کانگریس نے ایف ٹی سی کو اس لیے قائم کیا تھا تاکہ منصفانہ مسابقت کا تحفظ کیا جا سکے اور صارفین، ورکرز اور ایماندار تاجروں کو غیر منصفانہ اور دھوکہ دہی کے طریقوں سے بچایا جا سکے۔لینا خان نے کہا کہ میں اس مشن کو برقرار رکھنے اور
امریکی عوام کی خدمت کی منتظر ہوں۔
