محکمہ اینٹی کرپشن کامختلف شہروں میں کرپٹ سرکاری ملازمین کے خلاف بڑا کریک ڈائو ن

ْلاہور(اُردو پوائنٹ اخبارتازہ ترین - این این آئی۔ 25 ستمبر2021ء) محکمہ اینٹی کرپشن نے مختلف شہروں میں کرپٹ سرکاری افسران کے خلاف بڑا کریک ڈائو ن کرتے ہوئے کرپشن اور رشوت ستانی کے مختلف واقعات میں 6 سرکاری ملازمین کوگرفتار کرکے رشوت کی مد میں وصول کئے گئے ہزاروں روپے برآمد کر کے مقدمات درج کر لئے گئے ۔ ڈی جی اینٹی کرپشن پنجاب گوہر نفیس کے مطابق اینٹی کرپشن نے بارانی یونیورسٹی چکوال کے فیلڈ آفیسر خالد حسین کو گرفتار کر لیا۔

ملزم نے زیتون کی فصل کی مد میں سرکاری خزانہ کو 48لاکھ کا نقصان پہنچایا ۔ملزم نے معاہدے برعکس زیتون کی ناقص فصل کاشت کرکے خزانہ سرکار کو بھاری نقصان پہنچایا۔ انہوںنے مزید بتایا کہ پنجاب بہاولپور کے موضع پکی وار سے لمبردار کو مقدمہ نمبر 8/21 میں گرفتار کیا گیا۔

(جاری ہے)

سول کورٹ یزمان کا بالیف اصغر علی پانچ ہزار رشوت وصول کرتے ہوئے گرفتار ہوا ۔

فیصل آباد سے جعلی دستاویزات پر ٹیچر بھرتی ہونے والے نعیم جاوید کوبھی گرفتار کر لیاگیا ۔ملزم کو گریجویشن کی جعلی ڈگری پر محکمہ تعلیم میں ٹیچر بھرتی کیا گیا تھا۔ ڈی جی اینٹی کرپشن گوہر نفیس کے مطابق راولپنڈی کے علاقہ کوٹلی ستیاں سے پٹواری خانزادہ کوعدالتی حکم پر گرفتارکر لیا گیا ،پٹواری کوٹلی ستیاں نے جعلی بیع نامہ تیار کرکے زمین کا انتقال کیا۔

عدالت نے ملزم کو تین سال قید اور پچاس ہزار جرمانے کی سزا سنائی ۔ ڈی جی اینٹی کرپشن کے مطابق ٹی ایم اے ساہیوال سے سینٹری ورکر خرم شہزاد کوبیس ہزار رشوت لیتے گرفتار کر لیا گیا،ملزم کے خلاف مقدمہ درج کرکے حوالات میں بند کردیا گیا۔ اینٹی کرپشن فیصل آباد نے مقدمہ نمبر 31/21میں محکمہ آبپاشی کے ہیڈ کلرک کو بھی گرفتار کر لیا۔