کراچی،بغیر ویکسی نیشن کارڈ راہگیروں پر مقدمات سے روک دیا گیا

ایڈیشنل آئی جی کی تھانیداروں کو کارروائیاں شادی ہالز، ہوٹلز اور تفریح مقامات تک محدود رکھنے کی ہدایت

ہفتہ 25 ستمبر 2021 13:59

کراچی(اُردو پوائنٹ اخبارتازہ ترین - این این آئی۔ 25 ستمبر2021ء) ایڈیشنل آئی جی کراچی یعقوب منہاس نے تھانیداروں کو کورونا وائرس کا ویکسی نیشن کارڈ نہ ہونے پر شہریوں کیخلاف مقدمات کے اندراج سے روک دیا۔ایڈیشنل آئی جی کراچی یعقوب منہاس نے تھانیداروں کو کارروائیاں شادی ہالز، ہوٹلز اور تفریح مقامات تک محدود رکھنے کی ہدایت کرتے ہوئے کہا کہ اسسٹنٹ کمشنر کی موجودگی میں پبلک مقامات پر کارروائی کی جائے۔

(جاری ہے)

واضح رہے کہ گزشتہ روزشہر میں 2 درجن سے زائد مقدمات درج کر کے تقریبا 40 افراد کو گرفتار کیا گیا تھا۔پولیس حکام کے مطابق مقدمات وبائی امراض ایکٹ 2014 کے تحت درج کیئے گئے تھے۔پولیس حکام کے مطابق محکمہ داخلہ سندھ کے مراسلے میں کارروائیوں سے متعلق واضح نہیں ہے۔واضح رہے کہ محکمہ داخلہ سندھ نے پبلک ڈیلنگ والے اداروں کے عملے کی کورونا وائرس کی ویکسینیشن لازمی قرار دی تھی۔محکمہ داخلہ سندھ نے ٹرانسپورٹ، انڈسٹریز، مارکیٹس میں عملے کی ویکسینیشن بھی لازمی قرار دی تھی۔