عرب اتحاد کا حوثیوں کی بارود سے لدی چار کشتیاں تباہ کرنے کا دعوی

کشتیاں بحرہ احمر سے گزرنے والے بین الاقوامی جہازوں پر حملے کے لیے تیار تھیں،بیان

اتوار 24 اکتوبر 2021 11:20

عرب اتحاد کا حوثیوں کی بارود سے لدی چار کشتیاں تباہ کرنے کا دعوی

صنعاء (اُردو پوائنٹ اخبارتازہ ترین - این این آئی۔ 24 اکتوبر2021ء) یمن کی آئینی حکومت کی رٹ بحالی کے لیے سعودی عرب کی قیادت میں عسکری معاونت فراہم کرنے والے عرب اتحاد نے یمن کی مغربی گورنری الحدیدہ میں حوثیوں کے ایک فوجی ٹھکانے کو نشانہ بنایا ہے، جہاں بارود سے لدی چار کشتیاں ممکنہ حملے سے پہلے تباہ کر دی گئیں۔

(جاری ہے)

سرکاری خبر رساں ایجنسی کے مطابق بیان میں کہا گیا کہ عرب اتحاد کے طیاروں نے الحدیدہ شہر کے مشرق میں الجبانہ کے ایک ساحلی اڈے کو نگرانی اور انٹیلی جنس اطلاعات پر نشانہ بنایا ہے۔

جہاں کشتیاں بحرہ احمر سے گزرنے والے بین الاقوامی جہازوں پر حملے کے لیے تیار تھیں۔عرب اتحاد کی کوششوں نے جنوبی بحیرہ احمر اور باب المندب میں جہاز رانی اور بین الاقوامی تجارت کے تحفظ میں اہم کردار ادا کیا ۔عرب اتحاد نے الحدیدہ میں کارروائی کے دوران تباہ کی جانے والی بارود سے لدی کشتیوں کی تصاویر بھی شیئر کی ہیں۔ بیان میں کہا گیا کہ اب تک 91 ایسی کشتیوں کو تباہ کیا جا چکا ہے۔