4ماہ قبل کسٹمز کی تحویل میں نایاب نسل کے 70 باز مر گئے

عرب ممالک میں ایک باز کی قیمت پاکستانی 20لاکھ روپے سے بھی زائد ہوتی ہے،70باز کی قیمت 21کروڑ روپے بنتی ہے

بدھ 26 جنوری 2022 15:10

4ماہ قبل کسٹمز کی تحویل میں نایاب نسل کے 70 باز مر گئے

کراچی(اُردو پوائنٹ اخبارتازہ ترین - این این آئی۔ 26 جنوری2022ء) محکمہ کسٹمز کی تحویل میں پکڑے گئے نایاب نسل کی70باز 4 ماہ قبل مرگئے۔کسٹمز ذرائع نے بتایا کہ مردہ بازوں کو عدالتی پراپرٹی کے طور پر فریج میں سنبھال کر رکھا گیا ہے، واضح رہے کہ ایک سال قبل محکمہ کسٹمز کے اینٹی اسمگلنگ آرگنائزیشن پریونٹیو نے گذری کراچی میں کارروائی کے دوران 75 باز برآمد کیے تھے، کسٹمز کورٹ نے کیس وائلڈ لائف کا قرار دیدیا تھا اور بازیاب شدہ 75 باز کسٹم کی تحویل میں رکھنے کا حکم دیا تھا جس میں سے 70 باز مرگئے پانچ کی حالت بھی خراب ہے۔

ذرائع نے بتایا کہ کسٹمز نے 70 مرے ہوئے بازوں کو کورٹ پراپرٹی طور اپنے پاس رکھ دیا ہے اور گذشتہ چار مہینوں سے مرے ہوئے باز کسٹمز کی تحویل میں ہی ہیں،ذرائع نے بتایا کہ بازوں کی متحدہ عرب امارات ودیگر ممالک میں مہنگے داموں فروخت کیا جاتا ہے، عرب ممالک میں ایک باز کی قیمت پاکستانی 20لاکھ روپیسے بھی زائد ہوتی ہے، باز کی قیمت اس کی نسل کو مدنظر رکھتے ہوئے قیمت لگائی جاتی ہے۔

(جاری ہے)

ایک اندازے کے مطابق 70باز کی قیمت 21کروڑ روپے بنتی ہے، ذرائع نے بتایا کہ ضبط کیے گئے بازوں کا تعلق سائیبریا سے تھا، بازوں کی حالت بگڑنے پر برطانیہ سے ٹیم بھی بلائی گئی تھی، باز کے ملکیت کے دعوے داروں نے عدالت میں لائسنس بھی پیش کیا تھا،لائسنس سندھ وائلڈ لائف جاری کرتی ہے۔ذرائع نے بتایا کہ دعوے داروں کے لائسنس سندھ وائلڈ لائف مینجمنٹ بورڈ نے جاری کیے تھے، وائلڈ لائف سندھ اور کسٹم حکام کے موقف کے بعد بازوں کو کسٹم ری ہیبلیٹیشن سینٹر میں رکھا گیا۔