محکمہ زراعت پنجاب کی بہاریہ مکئی کی فی ایکڑ زیادہ پیداوار کیلئے سفارشات جاری

جڑانوالہ(اُردو پوائنٹ اخبارتازہ ترین - آن لائن۔ 01 فروری2022ء) محکمہ زراعت پنجاب کے ترجمان نے کہا ہے کہ صوبہ پنجاب میں بہاریہ مکئی کی کاشت 22 لاکھ ایکڑ سے زائد رقبہ پر کی جاتی ہے ۔مکئی کی کامیاب کاشت کے لئے بھاری میرا ، گہری ، 1.0فیصد سے زائدنا میا تی مادہ رکھنے والی، 7سی8 پی ایچ کی حامل اور پانی کو بخوبی جذب کرنے والی زمین موزوں ہے۔ریتلی ، کلراٹھی اورسیم زدہ زمین مکئی کی کاشت کے لئے موزوں نہیں ہے۔

کاشتکار بہاریہ مکئی کی منظور شدہ ہائبرڈ اقسام وائی ایچ1898 ، ایف ایچ988 ،ایف ایچ1046 اور وائی ایچ 5427 کی کاشت رواں ماہ کے آخر تک مکمل کر سکتے ہیں اس کے علاوہ مکئی کی منظور شدہ عام اقسام ملکہ2016،،گوہر19 ،ساہیوال گولڈ،سمٹ پاک، پاپ1 اور سویٹ1 کی کاشت پنجاب کے پہاڑی و میدانی علاقوں میںفروری کے آخر تک کاشت مکمل کر سکتے ہیں۔

(جاری ہے)

مکئی کے کاشتکار آبپاش علاقوں میں ووٹوں پر کاشت کے لئے شرح بیج 8 تا10 کلوگرام فی ایکڑ جبکہ بارانی علاقوں میں ڈرل سے کاشت کی صورت میں 12 تا15 کلو گرام فی ایکڑ بیج استعمال کریں۔

زمین کے انتخاب کے دوران زیرِ زمین اچھے پانی کی دستیابی ، زمین میں بوئی گئی سابقہ فصل اور کھیتوں کے اردگرد موجود درختوں وغیرہ کو بھی مدنظر رکھنا ضروری ہے۔ترجمان نے مزید کہا کہ بہاریہ مکئی کوبڑھوتری اوربرداشت تک لمبے دنوں کی وجہ سے زیادہ روشنی اور مناسب درجہ حرارت ضرورت ہوتی ہے جو پودوں کی صحت اور زیادہ پیداوار کے لئے سود مند ہے۔بہاریہ مکئی کی فی ایکڑ اوسط پیداوار موسمی مکئی کی فی ایکڑ اوسط پیداوار سے تقریباً 20 سے 25 فیصد زیادہ ہوتی ہے۔بہاریہ مکئی کی ہائبرڈ اقسام کو شرقاً غرباًوٹوں کی ڈھلوان پرایک ایک بیج جنوبی سمت پانی لگانے کے فوراًبعد6انچ کے فاصلے پر کاشت کریں۔ہائبرڈ اقسام کیلئے پودوں کی تعداد26ہزار جبکہ عام اقسام کیلئے 23 ہزار فی ایکڑ رکھیں۔