لاہور،محکمہ زراعت پنجاب کی پری مون سون کے دوران کپاس کی بہتر نگہداشت کے لئے حکمت عملی جاری

لاہور (اُردو پوائنٹ اخبارتازہ ترین - آن لائن۔ 27 جون2022ء) محکمہ زراعت پنجاب نے پری مون سون کے دوران کپاس کی بہتر نگہداشت کیلئے حکمت عملی جاری کر دی۔ترجمان محکمہ زراعت نے پری مون سون کی بارشوں کے دوران مختلف فصلات کے تحفظ کیلئے بتایا ہے کہ کماد،دھان اور چارہ جات کی فصلات پانی کی زیادتی کو برداشت کر جاتی ہیں لہذا بارش کے زائد پانی کو ان فصلات میں منتقل کرنے سے مضر اثرات مرتب نہیں ہوتے ہیں جب کہ کپاس اور سبزیات کی فصلات پانی کی زیادتی برداشت نہیں کرتی ہیں اس لئے ان فصلات سے بارش کے زائد پانی کی نکاسی کا فوری بندوبست کرنا چاہیے تاکہ یہ فصلات بارشوں کے مضر اثرات سے محفوظ رہیں۔

ترجمان نے کہا کہ کہ کاشتکاروں کو چاہیے کہ وہ ریڈیو اور ٹی وی سے نشر ہونے والے موسمی پیشن گوئی پر نظر رکھیں تاکہ اپنی فصلوں کی آبپاشی کیلئے اس کے مطابق اپنا پروگرام ترتیب دے سکیں۔

(جاری ہے)

امسال محکمہ موسمیات کی پیش گوئی کے مطابق مون سون کے موسم میں زیادہ بارشوں کا امکان ہے لہذا کاشتکار اس کے مطابق عمل کریں اور فصلات کی حفاظت کیلئے اقدامات کریں اس سلسلے میں کاشتکار اپنی فصلات یا فارمز میں نکاسیِ آب کا نظام خاص طور پر بہتر کریں۔

ترجمان نے یہ بھی بتایا کہ مون سون کے موسم میں جڑی بوٹیوں کی افزائش میں اضافہ ہوتا ہے۔انکا کہنا تھا کہ یہ جڑی بوٹیاں نہ صرف غذائی ضرروتوں کے اعتبار سے فصل کے پودوں سے مقابلہ کرتی ہیں بلکہ یہ ضرر رساں کیڑوں کی پناہ گاہ بھی ثابت ہوتی ہیں۔اس موسم میں رس چوسنے والے کیڑوں کے حملے کا خطرہ زیادہ ہو جاتا ہے کیونکہ موسم میں نمی اور حبس ان کی افزائش میں معاون ثابت ہوتی ہے اس لئے کاشتکار ان ضرررساں کیڑوں کے تحفظ کیلئے محکمہ زراعت (توسیع یا پیسٹ وارننگ)کے مقامی عملے سے مشورہ کریں اور بارش بند ہونے کی صورت میں محکمہ زراعت کے مقامی عملے کے مشورہ سے سپرے کریں۔کاشتکار فصلات کی کاشت ترجیحا پٹریوں پر کریں کیونکہ اس سے فصلات بارشوں کے ہونے والے مضر اثرات سے محفوظ رہتی ہیں