ممنوعہ فنڈنگ کیس :اسلام آباد ہائی کورٹ نے پی ٹی آئی سیکرٹریٹ ملازمین کو دیئے گئے نوٹسزایس او پیز کے مطابق جاری کرنے کی یقین دہانی پر درخواست نمٹا دی

بدھ 10 اگست 2022 17:00

اسلام آباد(اُردو پوائنٹ اخبارتازہ ترین - آن لائن۔ 10 اگست2022ء) اسلام آباد ہائی کورٹ کے قائم مقام چیف جسٹس عامر فاروق نے ممنوعہ فنڈنگ کیس میں ایف آئی اے کی پی ٹی آئی سیکرٹریٹ ملازمین کو دیئے گئے نوٹسزایس او پیز کے مطابق جاری کرنے کی یقین دہانی پر درخواست نمٹا دی۔

(جاری ہے)

ایف آئی اے حکام عدالت کے سامنے پیش ہوئے اور ڈائریکٹر نے قانون کے مطابق عمل کرنے کی یقین دہانی کرائی، عدالت سے رجوع کرنے والوں میں محمد ارشد، محمد رفیق اور طاہر اقبال شامل ہیں پاکستان تحریک انصاف کے وکیل شاہ خاور نے عدالت کو بتایا کہ ایف آئی اے نے نوٹس جاری کرنے میں میں پراسیس پر عمل نہیں کیااسی دن نوٹس جاری کر کے اسی دن پیش ہونے کا کہا گیا جس پر عدالت نے کہا کہ بظاہر ایف آئی اے نے اپنے ہی سرکولر پر عمل نہیں کیاجس کو نوٹس بھیجا جانا ہے اسے پتہ تو ہو کیوں بلایا گیا جس پر ایف آئی اے اہلکاروں نے عدالت کو بتایا کہ وہ سرکولر تو سائبر کرائم سے متعلق تھا جس پر عدالت نے کہا کہ آپ یہ کہنا چاہتے ہیں سائبر کرائم ونگ ایف آئی اے سے الگ ہی یہ ونگ تو ایف آئی اے نے خود اپنی سہولت کیلئے بنائے ہیں ابتدائی طور پر جسے نوٹس بھیجا جائے اسے وجہ لازمی بتائی جائے جس پر پی ٹی آئی وکیل نے عدالت کو بتایا کہ ایف آئی اے کو طریقہ کار پر عمل کا پابند کیا جائے جس پر عدالت نے کہا کہ ایف آئی اے کو صرف اپنے سرکلر پر عمل کا کہہ سکتے ہیں یہ بھی تو نہیں ہو سکتا ایف آئی اے نوٹس کے ساتھ گلدستہ لے کر آئے ہم اس درخواست پر مناسب حکمنامہ جاری کریں گے عدالت نے درخواست نمٹا دی۔