شیخ محمد بن زاید النہیان کی اسلام آباد آمد پر سکیورٹی کے غیر معمولی انتظامات

شیخ محمد بن زاید النہیان کے دورے کے دوران جڑواں شہروں میں میٹرو بس سروس محدود رہے گی،

اتوار 29 جنوری 2023 23:00

شیخ محمد بن زاید النہیان کی اسلام آباد آمد پر سکیورٹی کے غیر معمولی ..

اسلام آباد (اُردو پوائنٹ اخبارتازہ ترین - این این آئی۔ 29 جنوری2023ء) ترجمان اسلام آباد پولیس نے کہا ہے کہ یو اے ای کے صدر کے دورے کے دوران وفاقی دارالحکومت کے داخلی اور خارجی راستوں، ریڈ زون اور ایکسپریس ہائی وے پر غیر معمولی سکیورٹی انتظامات کیے گئے ۔اسلام آباد پولیس کی جانب سے عوام کو غیر ضروری نقل و حرکت سے گریز کرنے کی ہدایت کی گئی ، سکیورٹی چیکنگ کے دوران بھی پولیس سے تعاون کی اپیل کی ہے۔

(جاری ہے)

شیخ محمد بن زاید النہیان کے دورے کے دوران جڑواں شہروں میں میٹرو بس سروس محدود رہے گی، آئی جے پی سے سیکرٹریٹ تک دن 9 بجے سے دوپہر 2 بجے تک سروس بند رہے گی۔راولپنڈی سیکشن میں میٹرو بس سروس معمول کے مطابق جاری رہے گی، اس کے علاوہ پاکستان فیڈرل ڈائریکٹوریٹ آف ایجوکیشن نے بھی وفاقی تعلیمی اداروں میں تعطیل کا اعلان کیا ہوا ہے۔اسلام آباد میں سی ڈی اے، ایس این جی پی ایل، آئیسکو اور ہسپتال کے عملے کو چھٹی نہیں ہوگی، ضلعی انتظامیہ اور میٹرو پولیٹن کارپوریشن کا سٹاف بھی پیر ڈیوٹی پر موجود ہو گا۔واضح رہے یو اے ای کے صدر 25 جنوری سے پاکستان کے نجی دورے پر رحیم یار خان میں موجود ہیں، پیر 30 جنوری کو اسلام آباد پہنچ کر وہ سرکاری سطح پر ملاقاتیں کریں گے۔