سی ٹی ڈی کا انٹیلی جنس بیسڈ آپریشن ، کالعدم تنظیموں کے 9 دہشتگرد گرفتار

لاہور(اُردو پوائنٹ اخبارتازہ ترین - این این آئی۔ 04 فروری2023ء) کائونٹر ٹیرر ازم ڈیپارٹمنٹ نے انٹیلی جنس بیسڈ آپریشن کرتے ہوئے لاہور سمیت دیگر شہروں سے کالعدم تنظیموں کے 9 دہشتگرد گرفتار کرلیے ۔سی ٹی ڈی پنجاب کے حکام کے مطابق دہشتگردوں کی گرفتاری لاہور ،گوجرانوالہ ، ڈی جی خان اور بہاولپور سے عمل میں لائی گئیں ۔ دہشت گردوں کا تعلق ٹی ٹی پی سے ہے ، دہشتگردوں میں عبدالرحمان ، روید خان ، غلام اللہ ، احمد حسن ، جلیل احمد ، امداد اللہ ، باسط علی ، جنید علی شامل ہیں ۔

(جاری ہے)

حکام کے مطابق دہشتگردوں کے قبضے سے خودکش جیکٹ بنانے کا سامان ، راکٹ چارجر، ہینڈ گرینیڈ اور بھاری اسلحہ برآمد ہوا ہے ۔ دہشتگرد حساس اضلاع میں دہشت گردی کا منصوبہ بنارہے تھے ۔سی ٹی ڈی حکام کے مطابق دہشت گردوں کے خلاف 7 مقدمات درج کرلیے گئے جبکہ تفتیش جاری ہے ۔سی ٹی ڈی حکام نے مزید کہا کہ انٹیلی جنس بیسڈ آپریشنز میں 20 مشتبہ افراد سے تفتیش کی گئی ، رواں ہفتے سی ٹی ڈی نے 476 کومبنگ آپریشنز کے دوران 91 مشتبہ افراد کو حراست میں لیا ہے جبکہ مشتبہ افراد کے خلاف 67 مقدمات درج کیے گئے ہیں۔