ام المومنین حضرت خدیجة الکبریٰ ؓکا یوم وصال یکم اپریل کو عقیدت واحترام سے منایا جائے گا

جمعرات 30 مارچ 2023 15:08

مکوآنہ (اُردو پوائنٹ اخبارتازہ ترین - این این آئی۔ 30 مارچ2023ء)ام المومنین حضرت خدیجة الکبریٰ ؓ کا یوم وصال یکم اپریل ہفتہ 10رمضان المبارک کو عقیدت و احترام سے منایا جائے گا۔اس سلسلے میں فیصل آباد سمیت ملک بھر کی مساجد میں علماء کرام وخطیب حضرات ام المومنین حضرت خدیجة الکبریٰؓ کی دین اسلام کیلئے خدمات کو خراج عقیدت پیش کریں گے،امام بارگاہوں میں منعقدہ مجالس عزاء کے دوران علماء کرام و ذاکرین حضرت خدیجة الکبریٰ ؓ کی سیرت مطہرہ پر روشنی ڈالیں گے۔

(جاری ہے)

ام المومنین حضرت خدیجة الکبریٰؓ سرور کائنات ؐ کی دیگر ازواج مطہرات کے مقابلہ میں سب سے زیادہ قریب تھیں۔ آپ ؓ مکارم اخلاق کا پیکر جمیل تھیں۔ عفت و پاکدامنی کے باعث زمانہ جاہلیت میں بھی آپ ؓ کو طاہرہ کے لقب سے یاد کیا جاتا تھا۔سب سے پہلے نبی کریمؐ نے جس خاتون سے نکاح فرمایا وہ سیدہ خدیجة الکبریٰ ؓ ہی تھیں۔ نکاح کے وقت آپ ﷺ کی عمر مبارک 25برس تھی جبکہ ام المومنین حضرت خدیجة الکبریٰ ؓ کی عمر40برس تھی۔ حضور ؑ کی رفاقت میں 25برس گزارنے کے بعد ام المومینن حضرت خدیجہ الکبریٰ 10رمضان المبارک کو65برس کی عمر میں وفات پاگئیں۔حضورر ﷺ نے خود قبر میں اتر کرآپ ؓ کو دفن کیا۔