پی ٹی آئی کراچی نے کراچی کے نوجوانوں کیلئے پارٹی میں شمولیت کے دروازے کھول دیئے،آن لائن فارم جاری

کراچی (اُردو پوائنٹ اخبارتازہ ترین - این این آئی۔ 22 نومبر2023ء) پاکستان تحریک انصاف کراچی نے کراچی کے نوجوانوں کیلئے تحریک انصاف میں شمولیت کے دروازے کھول دیئے پی ٹی آئی یوتھ ونگ کراچی کی کراچی کے نوجوانوں کو تحریک انصاف کا حصہ بننے کی دعوت، پی ٹی آئی میں شامل ہونے کیلئے خواہشمند نوجوان انٹرنیٹ سے شمولیتی آن لائن ای فارم ڈاؤن لوڈ کرسکیں گے، شمولیتی ای فارم پر نوجوان اپنی مکمل تفصیلات درج کریں گے، بلخصوص پارٹی میں اہم عہدوں کے خواہشمند نوجوان کراچی کے مختلف اضلاع سے ٹاؤنز کی سطح تک تحریک انصاف کیلئے اپنی سیاسی خدمات انجام دے سکیں گے، اس حوالے سے ترجمان پی ٹی آئی کراچی نے کہا کہ پاکستان بلخصوص کراچی کے نوجوان ذہانت اور صلاحیتوں کے اعتبار سے کسی سے کم نہیں اور انہوں نے ہر شعبہ میں اپنی صلاحیتوں کا لوہا منوایا ہے،ملکی سیاسی تاریخ میں نوجوانوں کا اہم کردار رہا ہے۔

(جاری ہے)

جدوجہد آزادی میں بھی نوجوانوں کے دستے آگے آگے تھے۔ چئیرمین پی ٹی آئی نے نوجوانوں کو سیاسی اور جمہوری شعور دیا ہے، پاکستان کے عوام اور اسکا نوجوان طبقہ عمران خان کے ساتھ کھڑا ہے۔پاکستان تحریک انصاف واحد جماعت ہے جس نے نوجوانوں میں سیاسی شعور کو اُجاگر کیا جوکہ ایک نیک شگون ہے،وطن عزیز اس وقت سیاسی و معاشی لحاظ سے نہایت نازک دور سے گزر رہا ہے۔

کراچی ملک کیلئے انجن کی حیثیت رکھتا ہے اور کراچی کے نوجوانوں کو بنیادی حقوق سے مسلط جماعتوں نے محروم رکھا، ترجمان پی ٹی آئی نے مزید کہا کہ نیلسن منڈیلا نے کہا تھا کہ سسٹم کو برا کہنے سے سسٹم نہیں بدلے گا بلکہ سسٹم کا حصہ بننے سے یہ بدل سکتا ہے۔ نوجوان اس قول پر غور کریں اور سیاست کا حصہ ضرور بنیں لیکن اپنا وژن واضح بنائیں، مسائل اور حقوق کی بات کریں، ملک میں تبدیلی لانے کے لیے آگے بڑھیں۔

نوجوان کسی بھی قوم کی ریڑھ کی ہڈی کے مانند ہوتے ہیں جو اپنی قوم میں نئی زندگی اور انقلاب کی روح پھونکتے ہیں۔ یہی وجہ ہے بیشتر قوموں کی بیداری اور ان کے انقلاب کا سہرا نوجوانوں کے سر جاتا ہے۔ دنیا میں نوجوانوں کی سیاست میں دلچسپی تیزی سے بڑھتی جارہی ہے جن میں سے کچھ نوجوان ملک کی اعلیٰ قیادت کے منصب تک پہنچ چکے ہیں۔پاکستان تحریک انصاف ایک سیاسی جمہوری اور نظریاتی جماعت ہے جو اپنے منشور اور عوام سے کئے گئے وعدوں کے مطابق کام کر رہی ہے اور پاکستان کو مکمل جمہوری اور فلاحی ریاست بنانے کے وژن پر گامزن ہے۔