نیشنل باسکٹ بال چمپئن شپ اختتام پذیر ،پاکستان واپڈا نے میدان مار لیا

پاکستان آرمی دوسرے، پاکستان ائیرفورس تیسرے لاہور کی ٹیم نے چوتھی پوزیشن حاصل کی

جمعہ 24 نومبر 2023 21:45

لاہور(اُردو پوائنٹ اخبارتازہ ترین - این این آئی۔ 24 نومبر2023ء) نیشنل باسکٹ بال چمپئن شپ اختتام پذیر ہوگئی ، ڈائریکٹرجنرل سپورٹس پنجاب ڈاکٹر آصف طفیل اختتامی تقریب کے مہمان خصوصی تھے، انہوں نے جیتنے والی ٹیموں کو ٹرافیاں اور انعامات دیئے ، اس موقع پر ڈی جی سپورٹس پنجاب ڈاکٹر آصف طفیل نے کہا ہے کہ قومی باسکٹ بال چمپئن شپ کا انعقاد خوش آئند ہے چمپئن شپ سے باسکٹ بال کے نئے کھلاڑی سامنے آئے ہیں اور یہ نیا ٹیلنٹ کھیلوں کی ترقی میں اہم کردار کرے گا، اس موقع پر ڈی جی سپورٹس پنجاب نے پہلی پوزیشن حاصل کرنے والی ٹیم واپڈا اور رنر اپ آرمی کی ٹیم کو ٹرافیاں دیں اور میڈلز پہنائے ،پاکستان ائیرفورس نے چمپئن شپ میں تیسری پوزیشن حاصل کی ہے جبکہ لاہور کی ٹیم کا چوتھا نمبر رہا، واپڈا نے آرمی کو73-70کے مارجن سے شکست دے کر پہلی پوزیشن حاصل کی ہے اور دوسرے نمبر پر پاکستان آرمی اور پاکستان ایئرفورس کی ٹیم نے لاہور کو81-56سے شکست دے کر تیسری پوزیشن حاصل کی ہے ، اس موقع پر مہمان خصوصی ڈائریکٹرجنرل سپورٹس پنجاب آصف طفیل کو باسکٹ بال فیڈریشن کے صدر بریگیڈئر(ر) افتخار منصور نے سوینئر پیش کیا جبکہ اس موقع جی سی یونیورسٹی کے وائس چانسلر احمدعدنان ، ڈی آئی جی غازی صلاح الدین ، باسکٹ بال فیڈریشن کے سیکرٹری خالد بشیربھی موجود تھے ، چیمپئن شپ میں ملک بھر سے 8ٹیموں نے شرکت کی تھی۔