نگراں وزیر آبپاشی سندھ کا محکمہ آبپاشی سندھ کی زمینوں پر قبضہ کے خاتمے کیلئے بڑا اقدام

روہڑی سرکل حیدرآباد اور خیرپور ایریگیشن سرکل سکھر میں سرکاری زمینوں سے غیر قانونی انکروچمنٹ و قبضے کے خاتمے کے لیے کمیٹیاں قائم،کمیٹیاں حتمی لائحہ عمل کے لیے پندرہ روز میں اپنی سفارشات کے ساتھ محکمے کو رپورٹ جمع کروائیں گی، ایشور لال

اتوار 3 دسمبر 2023 16:05

کراچی(اُردو پوائنٹ اخبارتازہ ترین - این این آئی۔ 03 دسمبر2023ء) نگراں وزیر آبپاشی سندھ ایشور لال نے محکمہ آبپاشی سندھ کی زمینوں پر قبضہ کے خاتمے کے لیے بڑا اقدام اٹھاتے ہوئے روہڑی سرکل حیدرآباد اور خیرپور ایریگیشن سرکل سکھر میں سرکاری زمینوں سے غیر قانونی انکروچمنٹ و قبضے کے خاتمے کے لیے کمیٹیاں قائم کردی ہیں۔ محکمہ آبپاشی سندھ کے جاری نوٹیفیکیشن کے مطابق روہڑی کینال سرکل حیدرآباد کی سربراہی سپرنٹنڈنٹ انجینئر ظہیر احمد میمن کریں گے جبکہ انکے ساتھ ایکس ای این ہالا ایریگیشن ڈویژن ہالا خالد جان بلوچ کمیٹی کے رکن ہوں گے۔

اسی طرح سے خیرپور ایریگیشن سرکل سکھر کی سربراہی سپرنٹنڈنٹ انجینئر اشفاق نوح میمن کریں گے جبکہ اراکین میں ایکس ای این بیراج ڈویژن سکھر سید علی شاہ اور ایکس ای این ریگولیشن سب ڈویژن سکھر امیر بخش مہر شامل ہوں گے، ایکس ای این ڈرینیج ڈویژن بدین فواد میمن دونوں کمیٹیوں میں اپنے فرائض انجام دیں گے۔

(جاری ہے)

نوٹیفیکیشن کے مطابق دونوں کمیٹیاں محکمہ آبپاشی سندھ کی تمام جائیدادوں بشمول دفاتر، زمین، پلاٹس و بنگلوں کی فہرست تیار کریں گی اور ساتھ ہی ساتھ محکمہ آبپاشی کی قبضہ شدہ زمینوں کی نشاندہی کریں گی۔

کمیٹیوں کو ہدایت دی گئی ہیں کہ وہ تمام قابضین و ملزمان کے ناموں بمعہ شناختی کارڈ کی فہرستیں تیار کرنے کے علاوہ سرکاری زمینوں پر قبضہ میں ملوث محکمہ آبپاشی کے افسران و ملازمین کی فہرستیں بھی تیار کریں گی۔ ہدایت نامے کے مطابق کمیٹیاں قبضہ شدہ زمینوں سے متعلق عدالتوں میں زیر التوا کیسز کا بھی جائزہ لیں گی اور 15 روز میں محکمے کو اپنی سفارشات کے ساتھ رپورٹ جمع کروائیں گی۔ کمیٹیوں کی سفارشات پر مبنی رپورٹ کی روشنی میں نگراں وزیر آبپاشی سندھ ایشور لال اگلے لائحہ عمل کا اعلان کریں گے۔