ایف پی سی سی آئی کے سالانہ اچیومنٹ ایوارڈز 23 دسمبر کو منعقد کرنے کا فیصلہ

بدھ 6 دسمبر 2023 23:20

کراچی (اُردو پوائنٹ اخبارتازہ ترین - این این آئی۔ 06 دسمبر2023ء) صدر ایف پی سی سی آئی عرفان اقبال شیخ نے بتایا ہے کہ ایف پی سی سی آئی کے سالانہ اچیومنٹ ایوارڈز کا انعقاد 23 دسمبر کو اسلام آباد کے سرینا ہوٹل میں کیا جائے گا ؛جو کہ ، پاکستان کے پرائیویٹ سیکٹر کے سب سے بڑے اور سب سے زیادہ انتظار کیے جانے والے ایوارڈز ہیں۔انہو ں نے کہا کہ اس سال کے ایوارڈز کی خاص بات یہ ہے کہ اس سال تمام اہم اور دوستانہ ممالک کے سفراء اس ایونٹ میں شرکت کریں گے اور ایوارڈز ونر ز کی حوصلہ افزائی کریں گے۔

مزید برآں،ڈپلومیٹک کور اسلام آباد کے قائم مقام ڈین اور مراکش کے سفیر Mohamed Karmoune تقریب کے چیف گیسٹ آف آنر ہوں گے۔صدر ایف پی سی سی آئی عرفان اقبال شیخ نے کہا کہ یہ سالانہ ایوارڈز کا 11 واں ایڈیشن ہوگا۔

(جاری ہے)

یہ بات قابل ذکر ہے کہ ایف پی سی سی آئی پاکستان کا سب سے بڑا ادارہ ہے کہ جو تجارت، صنعت اور خدمات کے شعبوں میں ملک کے تمام 250 چیمبرز، ایسوسی ایشنز اور ٹریڈ باڈیز کی نمائندگی کرتا ہے۔

لہذا ، ایف پی سی سی آئی کی اچیومنٹ ایوارڈ کی تقریب پاکستان کی معیشت کے تمام بڑے اسٹیک ہولڈرز کو اپنی طرف متوجہ کرتی ہے۔صدر ایف پی سی سی آئی عرفان اقبال شیخ نے کہا کہ یہ پہلا موقع ہے کہ پاکستان کے تجارتی شراکت داروں اور بڑے غیر ملکی سرمایہ کاروں کی نمائندگی کرنے والے متعدد معززین اس پر وقار تقریب کو اعزاز دیں گے اور یہ پاکستان کی کاروباری برادری کو دنیا بھر میں بڑے تجارتی امکانات سے فائدہ اٹھانے کے لیے ایونٹ کے وسیع پو ٹینشل سے فائدہ اٹھانے کا ایک منفرد موقع فراہم کرے گا۔

صدر ایف پی سی سی آئی عرفان اقبال شیخ نے اس بات پر روشنی ڈالی کہ ہر سال کی طرح ایف پی سی سی آئی کے اچیومنٹ ایوارڈز کو تمام معروف قومی اور بین الاقوامی خبر رساں اداروں میں وسیع پیمانے پر کور کیا جائے گا؛ اس کے ساتھ ساتھ سوشل میڈیا پر لائیو سٹریمنگ بھی دستیاب ہو گی۔ ایوارڈز کی یہ تشہیر اور رسائی پاکستانی کاروباری برادری کے لیے ایک اضافی فائدہ ہو گی؛ جس کا مقصد ان تاجروں کی حوصلہ افزائی اور کارکردگی کو تسلیم کرنا ہی؛ جنہوں نے پاکستان کی تجارت اور صنعت کے فروغ کے لیے انتھک کارکردگی کا مظاہرہ کیا ہے۔