Live Updates

سٹیٹ بینک ہوم انڈسٹری کے فروغ کیلئے کم شرح سود پر قرضوں کی فراہمی یقینی بنائے،خرم طارق

جمعہ 9 مئی 2025 12:32

فیصل آباد (اُردو پوائنٹ اخبارتازہ ترین - این این آئی۔ 09 مئی2025ء)ایوان صنعت و تجارت فیصل آباد کے سابق صدرڈاکٹر خرم طارق نے کہاکہ مقامی صنعتوں اور چھوٹے و درمیانے درجے سمیت ہوم انڈسٹری کے فروغ کیلئے وافر مقدار میں کم شرح سود پر قرضوں کی فراہمی کی غرض سے بینک دولت پاکستان فوری اقدامات یقینی بنائے تاکہ ملک میں اقتصادی و معاشی استحکام میں مدد مل سکے۔

ایک ملاقات کے دوران انہوں نے کہاکہ شرح سود میں کمی بہتر ہونیوالے معاشی اعشاریوں کے استحکام کی سمت ایک اہم قدم ہوگاجس سے ملک میں ہوم انڈسٹری اور چھوٹی و درمیانی صنعتوں کے احیاکی راہ ہموار ہوگی۔ انہوں نے کہا کہ سٹیٹ بنک آف پاکستان کو ایسے اقدامات کرنے ہونگے جن کی وجہ سے کاروباری صورتحال سے نمٹنے،مقامی صنعتوں اور خاص طور پر چھوٹی اور درمیانے درجے کی صنعتوں کو وافر مقدار میں کم شرح سود پر قرض مہیا کیا جا سکے،اگر صنعتوں کیلئے کم شرح سود پر سرمایہ مہیا کیا گیا تو اس سے نہ صرف نئی صنعتیں لگیں گی بلکہ اس کے نتیجہ میں بڑے پیمانے پر روزگار کے نئے مواقع بھی پیدا ہونگے۔

(جاری ہے)

مزید برآں صنعتی پیداوار میں اضافہ سے برآمدات بڑھیں گی اور اسکی وجہ سے زرمبادلہ کے ذخائر کے ساتھ ساتھ حکومتی محاصل میں بھی اضافہ ہوگا۔ انہوں نے کہا کہ مستقبل میں بھی معاشی اعشاریوں میں بہتری اور شرح سود میں کمی کے ثمرات عوام تک منتقل کرنے کیلئے بھی فوری اقدامات کی ضرورت ہے تا کہ عوام کو ریلیف مہیا ہوسکے۔