چوتھا علامہ اقبال پولو کپ،ڈائمنڈ پینٹس اور ایف جی دین پولو نے فائنل کیلئے کوالیفائی کرلیا

جمعہ 8 دسمبر 2023 23:14

لاہور (اُردو پوائنٹ اخبارتازہ ترین - اے پی پی۔ 08 دسمبر2023ء) جناح پولو فیلڈز کے زیراہتمام چوتھے علامہ اقبال پولو کپ 2023 ء میں ڈائمنڈ پینٹس پلاٹینم ہومز اور ایف جی دین پولو نے فائنلز کیلئے کوالیفائی کرلیا۔جناح پولو فیلڈز کے سیکرٹری میجر علی تیمور (ر) کے مطابق جناح پولو فیلڈز میں گزشتہ ہفتے سے جاری ایونٹ میں آٹھ بہترین ٹیمیں کھیل رہی ہیں۔

چار ٹاپ ٹیموں نے سیمی فائنلز کیلئے کوالیفائی کیا جس میں سے دو فاتح ٹیموں نے فائنل کیلئے کوالیفائی کیا ہے۔ پہلے سیمی فائنل میچ میں ڈائمنڈ پینٹس پلاٹینم ہومز نے شاندار کھیل پیش کرتے ہوئے ری مانٹس کی ٹیم کو دلچسپ مقابلے کے بعد9.5-8 گول سے ہراکر فائنل کے لئے کوالیفائی کیا۔ ڈائمنڈ پینٹس پلاٹینم ہومز کی طرف سے راجہ تیمور ندیم نے شاندار کھیل پیش کیا اور سات خوبصورت گول سکور کیے جبکہ ثاقب خان خاکوانی نے دو گول سکور کیے جبکہ آدھا گول انہیں ہینڈی کیپ ایڈوانٹیج حاصل تھا۔

(جاری ہے)

ری مانٹس کی طرف سے لا بی لینڈا نے تین، محمد نعیم اور عمران شاہد نے دو دو گول جبکہ عمر اسجد ملہی نے ایک گول سکور کیا۔ دوسرے سیمی فائنل میں ایف جی دین پولو نے زبردست مقابلے کے بعد ماسٹر پینٹس نیوایج کیبلز کی ٹیم کو 9-4 سے ہرا دیا۔ ایف جی دین پولو کی طرف سے بلال حئی نے شاندار کھیل پیش کیا اور سات گول سکور کیے جبکہ دیگر میں خوان کروز گروگل نے دو گول سکور کیے۔ ماسٹر پینٹس نیوایج کیبلز کی طرف سے حمزہ مواز خان نے تین اور عدنان جلیل اعظم نے ایک گول سکور کیا۔ٹورنامنٹ کا فائنل اتوار کی سہ پہر اڑھائی بجے ڈائمنڈ پینٹس اور ایف جی دین پولو کی ٹیموں کے درمیان کھیلا جائے گا۔