Live Updates

پاکستانی باکسر محمد وسیم نے عالمی ٹائٹل اپنے نام کر لیا

اتوار 11 مئی 2025 11:45

کوئٹہ(اُردو پوائنٹ اخبارتازہ ترین - این این آئی۔ 11 مئی2025ء)پاکستان کے مایہ ناز پروفیشنل باکسر محمد وسیم کیوبا کے انٹرنیشنل باکسر کو ناک آئوٹ کر کے نئے عالمی چیمپئن بن گئے۔ پاکستان انٹرنیشنل باکسنگ چیمپئن شپ کے سنسنی خیز مقابلے پولو گرائونڈ کوئٹہ کینٹ میں جاری ہیں،ان مقابلوں میں پاکستان سمیت 9 ممالک کے باکسرز حصہ لے رہے ہیں،ورلڈ ٹائٹل فائٹ کے آخری مقابلے میں پاکستان کے مایہ ناز باکسر محمد وسیم نیکیوبن باکسر کو ناک آئوٹ کر کیٹائٹل حاصل کیا۔

گورنر بلوچستان جعفرخان مندوخیل تقریب کے مہمان خصوصی تھے جبکہ وزیراعلیٰ بلوچستان میرسرفراز بگٹی، صوبائی وزراء، اراکین اسمبلی، کمانڈر 12 کور راحت نسیم احمد خان، آئی جی ایف سی (نارتھ) بلوچستان میجر جنرل عابد مظہر، آی جی پولیس بلوچستان معظم جاہ انصاری، اور اعلیٰ سول و ملٹری آفیسران سمیت خواتین کی ایک بڑی تعداد موجودتھی۔

(جاری ہے)

گورنر بلوچستان نے تقریب سے خطاب کرتے ہوئے محمد وسیم کو مبارکباد دیتے ہوئے کہا کہ آج کی تاریخی جیت سے پاکستان اور بلوچستان دونوں کا سر فخر سے بلند ہوگیا،ہمیں کوئٹہ میں انٹرنیشنل باکسنگ چیمپئن شپ کی میزبانی کرنے پر فخر ہے، بلوچستان کے لوگ اپنی مہمان نوازی اور محبت کیلئے مشہور ہیں، یہ ہماری شاندار روایت ہے کہ ہم آنے والے تمام مہمانوں کے ساتھ دوست کی طرح برتاؤ کر رہے ہیں۔