پاکستان علماء کونسل کا علامہ مسعود الرحمن عثمانی کی المناک شہادت پر اظہار افسوس

اسلام آباد (اُردو پوائنٹ اخبارتازہ ترین - این این آئی۔ 05 جنوری2024ء) پاکستان علماء کونسل نے معروف عالم دین اور اہلسنت والجماعت پاکستان کے رہنما علامہ مسعود الرحمن عثمانی کی المناک شہادت پر گہرے رنج و کم کا اظہار کرتے ہوئے کہا ہے کہ سیدنا صدیق اکبرؓ کے یوم وفات کے موقع پر مولانا عثمانی کی ٹارگٹ کلنگ ملک میں فرقہ وارانہ فسادات کرانے کی سازش ہے، پاکستان اور اسلام دشمن قوتیں ریاست میں ایک بار پھر فسادات کو ہوا دینے کی سازشیں کررہی ہیں۔

تفصیلات کے مطابق چیئرمین پاکستان علماء کونسل حافظ محمد طاہر محمود اشرفی ، علامہ عبد الحق مجاہد ، مولانا محمد رفیق جامی ، مولانا نعمان حاشر ، مولانا اسعد زکریا قاسمی ، مولانا محمد شفیع قاسمی ، مولانا اسد اللہ فاروق، علامہ زبیر عابد، مولانا محمد اشفاق پتافی ، مولانا ابو بکر حمید صابری ، مولانا طاہر عقیل اعوان، مولانا عزیز اکبر قاسمی ، مولانا حق نواز خالد، مولانا عبید اللہ گورمانی ، علامہ طاہر الحسن مولانا حنیف عثمانی ، مولانا محمد اصغر کھوسہ ، مولانا انوار الحق مجاہد ،مولانا عبد المالک آصف ، مولانا اسلم صدیقی، مولانا عبد الحکیم اطہر، قاری محمد اسلم قادری ،مولانا عبد اللہ حقانی، مولانا عبد الوحید فاروقی ، مولانا ابو بکر حمزہ ، مولانا حبیب الرحمن عابد،مولانا امین الحق اشرفی، مولانا اظہار الحق خالد، صاحبزادہ حمزہ طاہر الحسن ، مولانا سعد اللہ لدھیانوی ، و دیگر نے علامہ مسعود الرحمن عثمانی کی شہادت پرزور مذمت کرتے ہوئے کہا کہ سیدنا صدیق اکبرؓ کے یوم وفات کے موقع پر مولانا عثمانی کی ٹارگٹ کلنگ ملک میں فرقہ وارانہ فسادات کرانے کی سازش ہے، پاکستان اور اسلام دشمن قوتیں ریاست میں ایک بار پھر فسادات کو ہوا دینے کی سازشیں کررہی ہیں۔

(جاری ہے)

انہوں نے کہا کہ پاکستان کے تمام مکاتب فکر کے علما و شیوخ کو دشمن کی سازش کو تحمل، برداشت اور بردباری سے ناکام بنانا ہوگا۔ علماء کونسل نے حکومت سے علامہ عثمانی کے قاتلوں کو فی الفور گرفتار کر کے قرار واقعی سزا دینے کا مطالبہ کرتے ہوئے کہاکہ مرحوم نے ہمیشہ دفاع صحابہؓ کا علم بلند رکھا اور اسی مشن میں اپنی جان قربان کردی۔