یو ای ٹی لاہور میں سالانہ کیریئر فیئر کا انعقاد،121کمپنیوں نے187 اسٹالز لگائے

جمعرات 22 فروری 2024 23:30

لاہور (اُردو پوائنٹ اخبارتازہ ترین - اے پی پی۔ 22 فروری2024ء) یونیورسٹی آف انجینئرنگ اینڈ ٹیکنالوجی لاہور نے سالانہ کیریئر فیئر 2024ء کا انعقاد کیاجس کا مقصد طلبہ کو موثر روزگار کے مواقع فراہم کرنے کے ساتھ ساتھ موجودہ کمپنیوں کے ساتھ اپنی شراکت داری کو مضبوط کرنا تھا۔وائس چانسلر یو ای ٹی لاہور پروفیسر ڈاکٹر ناصر حیات نے تقریب کا افتتاح کیا۔

انہوں نے کنوینئر کیریئر فیئر پروفیسر ڈاکٹر نوید رمضان اور کوآرڈینیٹر پروفیسر ڈاکٹر آصف علی قیصر کے ہمراہ کمپنیوں/انڈسٹریز کے تمام سٹالز کا دورہ کیا۔ترجمان کے مطابق یو ای ٹی لاہور گزشتہ 9 سالوں سے سالانہ کیرئیر فیئر کا انعقاد کر رہی ہے،2015 ء میں کیرئیر فیئر کا آغاز 20 صنعتوں کے20 اسٹالز سے ہوا۔اسی طرح2016 ء میںاسٹالز کی تعداد 65،2017 ء میں100 اور2019 ء میں114 تھی جبکہ 2020 ء سے2023 ء تک یہ تعداد بالترتیب 130، 111، 161 اور 175 اسٹالز تک پہنچ گئی۔

(جاری ہے)

رواں سال تقریبا 121 صنعتوں نے187 اسٹالز کے ساتھ ایونٹ میں حصہ لیا۔یہ کمپنیاں سافٹ وئیر اور آئی ٹی، کیمیکل اور پولیمر، ٹیکسٹائل، کنسٹرکشن، مکینیکل، اسٹیل، ایجوکیشنل کنسلٹنٹ وغیرہ سے تعلق رکھتی تھیں۔ ترجمان کے مطابق مختلف انڈسٹریز نے انٹرویوز، ٹیسٹ اور اورینٹیشن سیشنز کا انعقاد کیا اور طلبہ کو موقع پر ہی ملازمت کی پیشکش بھی کی۔ وائس چانسلر پروفیسر ڈاکٹر ناصر حیات نے چیئر پروفیسر ڈاکٹر نوید رمضان، کو چیئر پروفیسر ڈاکٹر آصف علی قیصر، سٹاف اور طلبہ سمیت آرگنائزنگ ٹیم کے دیگر ممبران کی کاوشوں کو سراہا۔ تقریب کے آخر پر شرکت کرنے والی کمپنیوں اور منتظمین کو سووینئرز پیش کیئے گئے۔