اسحاق ڈار کی نیوکلیئر انرجی سمٹ کے موقع پر آذربائیجان کے ہم منصب سے ملاقات

جوہری توانائی کے استعمال کے ذریعے موسمیاتی تبدیلیوں کا مقابلہ کرنے کے عزم کا اعادہ

جمعرات 21 مارچ 2024 23:20

برسلز/اسلام آباد(اُردو پوائنٹ اخبارتازہ ترین - این این آئی۔ 21 مارچ2024ء) وزیر خارجہ محمد اسحاق ڈار نے برسلز میں نیوکلیئر انرجی سمٹ 2024کے موقع پر آذربائیجان کے وزیر خارجہ جیہون بیراموف سے ملاقات کی۔

(جاری ہے)

ترجمان دفتر خارجہ کی جانب سے جاری بیان کے مطابق دونوں وزراء خارجہ نے جوہری ٹیکنالوجی کے پرامن استعمال بالخصوص زراعت اور انسانی صحت سمیت تمام شعبوں میں پاکستان اور آذربائیجان کے تعاون کو مزید گہرا کرنے کا عزم کیا۔

انہوں نے جوہری توانائی کے استعمال کے ذریعے موسمیاتی تبدیلیوں کا مقابلہ کرنے کے عزم کا اعادہ کیا۔ بیان کے مطابق پاکستان اور آذربائیجان زراعت سمیت ایٹمی ایپلی کیشنز میں کامیابی سے تعاون کر رہے ہیں۔ وزیر خارجہ محمد اسحاق ڈار نے آذربائیجان کے ساتھ جوہری ٹیکنالوجی کے پرامن استعمال میں تجربے اور مہارت کے اشتراک کے لیے پاکستان کی تیاری سے آگاہ کیا۔