د*اسلام آباد ہائیکورٹ کا شیریں مزاری کا نام ای سی ایل سے نکالنے کا حکم

ف* ہم نے بھی 27 مارچ کو وزیراعظم کو خط لکھ کر اطلاع دے دی تھی،اسسٹنٹ اٹارنی جنرل ھ* کابینہ کے پاس اور کام بہت ہیں یہ کام ہم کردیتے ہیں،جسٹس ثمن رفعت امتیاز کے ریمارکس

جمعرات 4 اپریل 2024 17:56

#اسلام آباد(اُردو پوائنٹ اخبارتازہ ترین - آن لائن۔ 04 اپریل2024ء) اسلام آباد ہائی کورٹ نے سابق وزیر شیریں مزاری کا نام ایگزٹ کنٹرول لسٹ (ای سی ایل) سے نکالنے کا حکم دے دیا۔اسلام آباد ہائی کورٹ میں پاکستان تحریک انصاف (پی ٹی آئی) کی سابق رہنما شیریں مزاری کا نام ای سی ایل سے نکالنے کی درخواست پر سماعت جسٹس ثمن رفعت امتیاز نے کی ، شیریں مزاری اپنے وکیل کے ہمراہ عدالت پیش ہوئیں ۔

(جاری ہے)

نیب پراسکییوٹر رافع مقصود نے عدالت کو بتایا کہ نیب نے مارچ میں ہی شیریں مزاری کا نام ای سی ایل سے نکالنے کی سفارش کر دی تھی ، کیونکہ شیریں مزاری 190 ملین پاونڈ نیب کیس میں ملزمہ نہیں ہیں۔اسسٹنٹ اٹارنی جنرل نے کہا کہ ہم نے بھی 27 مارچ کو وزیراعظم کو خط لکھ کر اطلاع دے دی تھی ۔ جسٹس ثمن رفعت امتیاز نے ریمارکس دیئے کہ کابینہ کے پاس اور کام بہت ہیں یہ کام ہم کردیتے ہیں ، عدالت نے شیریں مزاری کا نام ای سی ایل سے نکالنے کا حکم دیا اور درخواست نمٹا دی۔ یاد رہے کہ یکم دسمبر کو اسلام آباد ہائی کورٹ نے شیریں مزاری کا نام پاسپورٹ کنٹرول لسٹ سے بھی نکالنے کا حکم دیا تھا۔