vکراچی میں 2 ہزار سے زائد موبائل فون چھیننے والا ڈاکو گرفتار

اتوار 14 اپریل 2024 19:10

ﷺکراچی (اُردو پوائنٹ اخبارتازہ ترین - آن لائن۔ 14 اپریل2024ء) مومن آباد پولیس کے ہاتھوں زخمی حالت میں گرفتار ڈاکو فرحان ولد عمر زادہ عادی جرائم پیشہ اور ڈکیت گینگ کا کارندہ نکلا۔ایس ایس پی ویسٹ عبدالحفیظ بگٹی نے بتایا کہ زخمی حالت میں گرفتار ڈکیت فرحان نے عیدالفطر کے دوسرے روز اورنگی ٹائون فٹبال چورنگی کے قریب ڈکیتی کے دوران مزاحمت پر خاتون کو ٹانگ پر گولی مار کر زخمی کیا تھا جبکہ ایک ماہ قبل اپنے دیگر ساتھیوں کے ہمراہ سائٹ اے کے علاقے میٹروول میں قائم بہرام اسٹور پر بھی ڈکیتی کی واردات میں ملوث اور سی سی فوٹیج میں دکھائی دے رہا تھا۔

گرفتار ڈکیت نے گزشتہ سال سوزوکی ڈرائیور کو بھی مزاحمت پر فائرنگ کر کے زخمی کیا تھا۔ اس نے دوران تفتیش میں مزید انکشاف کیا گیا کہ اس نے سال 2022 سے اب تک اسٹریٹ کرائمز کی وارداتوں میں 2 ہزار سے زائد موبائل فون چھینے ہیں۔

(جاری ہے)

اس کے ساتھی عدنان اور فرحان چھینے گئے موبائل خرید کر ان کے آئی ایم ای آئی نمبر تبدیل کر کے فروخت کرتے ہیں جبکہ گرفتار ڈکیت عادی جرائم پیشہ ہے جس کے خلاف اس سے قبل سائٹ اے، مومن آباد اور پیر آباد تھانے میں ڈکیتی، گٹکا ماوا ایکٹ، غیر قانونی اسلحہ برآمدگی اور پولیس مقابلے سمیت دیگر دفعات کے تحت مقدمات درج ہیں۔گینگ میں بلال، رحمٰن، عدنان اور رحمٰن سمیت باوانی چالی کا ایک رہائشی بھی شامل ہے جن کی تلاش میں پولیس چھاپے مار رہی ہے۔