امریکا کی طرح پاکستانی یونیورسٹیز میں بھی غزہ مہم کا اعلان

امریکی طلبہ نے مزاحمت کی نئی تاریخ رقم کردی، ناظم اعلی اسلامی جمعیت طلبہ حسن بلال ہاشمی

ہفتہ 27 اپریل 2024 23:18

پشاور(اُردو پوائنٹ اخبارتازہ ترین - این این آئی۔ 27 اپریل2024ء) اسلامی جمعیت طلبہ پاکستان نے تعلیمی اداروں میں غزہ مہم شروع کرنے کا اعلان کردیا۔ناظم اعلی اسلامی جمعیت طلبہ پاکستان حسن بلال ہاشمی نے پشاور پریس کلب میں پریس کانفرنس کرتے ہوئے بتایا کہ اسلامی جمعیت طلبہ پاکستان ‘‘وی آر ون سلوگن کے تحت ‘‘جسٹس فار غزہ مہم شروع کررہی ہے، جس کے ذریعے پاکستان کی سول سوسائٹی کو فلسطین کاز کے لیے متحرک کردیاجائے گا۔

حسن بلال ہاشمی نے کہا کہ اس کمپین کے تحت فلسطین کاز اور غزہ کی موجودہ صورتحال سے متعلق تعلیمی اداروں میں آگاہی مہم چلائے جائے گی، سیمینارز اور کانفرنسز کا انعقاد کیاجائے گا، بڑے پیمانے پر احتجاجی مظاہرے کیے جائیں گے۔انہوںنے کہاکہ غزہ میں فوری جنگ بندی اور امدادی سامان کی ترسیل کے لیے حکومت کے سامنے مطالبات رکھے جائیں گے، کمپین کے اختتام پر تعلیمی اداروں میں علامتی بستیاں بھی سجائی جائیں گی، اسلامی جمعیت طلبہ امریکی جامعات میں ہونے والے احتجاجی مظاہروں کی بھر پور حمایت کا اعلان کرتی ہے۔

(جاری ہے)

حسن بلال ہاشمی نے کہا کہ امریکی طلبہ نے مزاحمت کی نئی تاریخ رقم کردی ہے، اہلیان غزہ کی خاطر کراچی سے لیکر نیو یارک تک تمام طلبہ اس تحریک کا حصہ ہیں، ‘‘وی آر ون’’سلوگن کے ذریعے اسلامی جمعیت طلبہ تمام طلبہ کو اس کمپین کا حصہ بننے کی دعوت دیتی ہے۔