دوسرا ٹی ٹونٹی جیتنے کے بعد شاہد آفریدی کی قومی بیٹرز کے سٹرائیک ریٹ کی تعریف

لاہور (اردو پوائنٹ تازہ ترین اخبار ۔ 13 مئی 2024ء ) سابق کپتان شاہد آفریدی نے پیر کو بابر اعظم کی زیر قیادت یونٹ نے آئرلینڈ کے خلاف دوسرا ٹی ٹوئنٹی جیتنے کے بعد پاکستان کے بلے بازوں کے اسٹرائیک ریٹ پر روشنی ڈالی۔ پاکستان نے دوسرے ٹی ٹوئنٹی میں آئرلینڈ کو سات وکٹوں سے شکست دے کر تین میچوں کی سیریز 1-1 سے برابر کر دی۔ شاہد آفریدی نے x پر پوسٹ کی کہ "ہمیں اس جیت کی ضرورت تھی۔

شاباش ٹیم، خاص طور پر جس طرح رضوان اور فخر نے کھیلا۔ ہمیں ورلڈ کپ میں اسی طرح کی ذہنیت اور زیادہ تر بلے بازوں کے لیے اسی طرح کے اسٹرائیک ریٹ کی ضرورت ہے‘‘۔ انہوں نے مزید کہا کہ شاہین کو 300 بین الاقوامی وکٹوں پر مبارکباد دیتا ہوں‘۔ واضح رہے کہ دوسرے ٹی ٹوئنٹی انٹرنیشنل میچ میں پاکستان نے آئرلینڈ کو 7 وکٹوں سے ہرادیا۔

(جاری ہے)

ڈبلن اسٹیڈیم میں کھیلے گئے میچ میں آئرلینڈ نے پاکستان کو جیت کیلئے 194 رنز کا ہدف دیا تھا، پاکستان نے مطلوبہ ہدف 16.5 اوورز میں 3 وکٹوں کے نقصان پر حاصل کرلیا۔

ہدف کے تعاقب میں پاکستان کی اننگز کا آغاز مایوس کن رہا اور صرف 13 رنز کے اسکور پر دو وکٹیں گر گئیں، صائم ایوب 6 رنز اور بابر اعظم صفر پر پویلین لوٹ گئے۔ دو وکٹیں جلدی گرنے کے بعد محمد رضوان اور فخر زمان نے ٹیم کو سہارا دیا اور شاندار بیٹنگ کا مظاہرہ کرتے ہوئے ٹیم کی کامیابی میں اہم کردار ادا کیا۔ محمد رضوان 75 رنز کے ساتھ ناٹ آوٹ رہے جبکہ فخر زمان نے 78 رنز کی شاندار اننگز کھیلی۔

فخر زمان کے آؤٹ ہونے کے بعد بیٹنگ کے لیے آنیوالے اعظم خان نے جارحانہ بیٹنگ کرتے ہوئے 10 گیندوں پر چار چھکوں اور ایک چوکے مدد سے 30 رنز بنائے۔ پاکستان نے 16.5 اوورز میں تین وکٹوں کے نقصان پر 194 رنز کا ہدف حاصل کرلیا۔ آئرلینڈ کی طرف سے مارک ایڈیر، گراہم ہیوم اور بین وائٹ نے ایک، ایک وکٹ حاصل کی۔ قبل ازیں پاکستان ٹیم کے کپتان بابراعظم نے ٹاس جیت کر بولنگ کا فیصلہ کیا تھا، آئرلینڈ نے پہلے بیٹنگ کرتے ہوئے مقررہ 20 اوورز میں سات وکٹوں کے نقصان پر 193 رنز بنائے تھے۔

آئرش ٹیم کی طرف سے لورکن ٹکر 51 ، ہیری ٹییکٹر 32، گیرتھ ڈیلانی 28 اور کرٹس چیمپر 22 رنز کے ساتھ نمایاں رہے۔ پاکستان کی طرف سے شاہین آفریدی نے 3، عباس آفریدی نے 2، محمد عامر اور نسیم شاہ نے ایک، ایک وکٹ حاصل کی۔