وفاقی کابینہ کی ایران کے صدر ڈاکٹر سید ابراہیم رئیسی، وزیرخارجہ حسین امیر عبداللہیان اور ان کے ر فقا کی ہیلی کاپٹر حادثے میں شہادت پر تعزیتی قرارداد

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔21مئی۔2024 ) وفاقی کابینہ نے ایران کے صدر ڈاکٹر سید ابراہیم رئیسی، ایرانی وزیرخارجہ حسین امیر عبداللہیان اور ان کے ر فقا کی ہیلی کاپٹر حادثے میں شہادت پر تعزیتی قراردادمنظور کرتے ہوئے پاک ایران تعلقات اور خطے کے حوالے سے خدمات پرڈاکٹر سید ابراہیم ریئسی کو خراجِ عقیدت پیش کیا جبکہ وزیر اعظم شہباز شریف نے کہا کہ ابراہیم ریئسی جیّد عالم اورصاحب بصیرت رہنما تھے، پاکستان نے مخلص اور بھائیوں جیسا دوست کھو دیا.

وزیراعظم کی زیرصدارت وفاقی کابینہ کے اجلاس میں ایرانی صدر، وزیر خارجہ اور ان کے رفقا کے لئے دعائے مغفرت بھی کی گئی قرار داد میں کہا گیا ہے کہ پاکستان کی حکومت اور عوام کو اسلامی جمہوریہ ایران کے صدر ڈاکٹر سید ابراہیم ریئسی اور ایرانی وزیر خارجہ حسین امیر عبداللہیان اور ان کے دیگر رفقا کی المناک حادثے میں شہادت کی خبر سے شدید صدمہ ہوا ہے ہم دکھ اور غم کی اس گھڑی میں سوگوار خاندانوں اور اسلامی جمہوریہ ایران کے عوام کے ساتھ دلی تعزیت کا اظہار کرتے ہیں.

قرارداد میں کہا گیا ہے کہ ہماری تمام تر ہمدردیاں شہداءکے اہل خانہ اور ایرانی عوام کے ساتھ ہیں اور پوری پاکستانی قوم مشکل کی اس گھڑی برادر ملک میں ایران کے ساتھ کھڑی ہے اس حوالے سے وفاقی کابینہ کے اجلاس سے خطاب کرتے ہوئے وزیراعظم نے کہا کہ ایرانی صدر ڈاکٹر سید ابراہیم ریئسی ایک جیّد عالم اور صاحب بصیرت رہنما تھے پاکستان نے ڈاکٹر ابراہیم ریئسی جیسا مخلص اور بھائیوں جیسا دوست کھو دیا.

وزیراعظم نے ڈاکٹر سید ابراہیم ریئسی کو خراج عقیدت پیش کرتے ہوئے کہا کہ ڈاکٹر ابراہیم رئیسی کی اپنی قوم کے ساتھ ساتھ پاکستان ایران تعلقات اور علاقائی تعاون کے فروغ کے لئے خدمات کو ہمیشہ یاد رکھا جائے گا انہوں نے کہا کہ گزشتہ ماہ ڈاکٹر ابراہیم ریئسی کا دورہ پاکستان ہمارے دوطرفہ تعلقات کو مزید مضبوط اور مستحکم کرنے کے حوالے سے ایک اہم سنگ میل تھا ایرانی صدر کے دورہ پاکستان کے دوران پاکستانی عوام کے ساتھ گزرے لمحات ہمیشہ یاد رکھے جائیں گے.

کابینہ کی طرف سے منظور کردہ قرار داد میں اس عزم کا اعادہ کیا گیا کہ مرحوم صدر ڈاکٹر سید ابراہیم ریئسی کے پاک۔

(جاری ہے)

ایران تعلقات کی مضبوطی اور فروغ کے وژن کو جاری رکھا جائے گا کابینہ نے دعا کی کہ اللہ تعالیٰ ایرانی صدر ڈاکٹر سید ابراہیم ریئسی، ایرانی وزیر خارجہ اور ان کے رفقاکو جنت الفردوس میں اعلیٰ مقام عطا کرے.