فیصل آباد،محکمہ صحت کی حاملہ خواتین کو دوران زچگی شرح اموات میں کمی کے لئے احتیاطی تدابیر پرعمل درآمد کی ہدایت

فیصل آباد (اُردو پوائنٹ اخبارتازہ ترین - اے پی پی۔ 22 مئی2024ء) ڈسٹرکٹ ہیلتھ اتھارٹی فیصل آباد کے چیف ایگزیکٹو آفیسر ڈاکٹر اسفند یار نے حاملہ خواتین کو دوران زچگی شرح اموات میں کمی کے لئے احتیاطی تدابیر پر عمل کر نے کی ہدایت کی ہے ۔ ڈسٹرکٹ ہیلتھ اتھارٹی فیصل آباد کے چیف ایگزیکٹو آفیسر ڈاکٹر اسفند یار نے کہا کہ حمل کے دوران خواتین کو کم از کم 4 مرتبہ اپناطبی معائنہ کروانا چاہیے تاکہ انہیں خود اور پیدا ہونیوالے بچے کی صحت سے متعلق مشکلات سے بچانا ممکن ہو سکے۔

انہوں نے بتایاکہ یہ معائنہ پہلے ماہ، پانچویں ماہ، آٹھویں ماہ اور نویں ماہ کروانا اشدضروری ہے۔انہوں نے کہا کہ دائیوں یا دیگر ہیلتھ سٹاف کی بجائے گائناکالوجسٹ یا لیڈی ہیلتھ وزیٹر سے طبی معائنہ کرانا سود مند ہو سکتا ہے۔

(جاری ہے)

انہوں نے بتایاکہ جو مائیں دوران حمل تشنج سے بچاؤ کے ٹیکے نہیں لگواتیں وہ جھٹکوں کی جان لیو ا بیماری کا بھی شکارہو سکتی ہیں۔

انہوں نے کہا کہ حمل کے دوران خواتین کو اضافی خوراک، مناسب آرام، چوتھے ماہ سے لے کر بچے کی پیدائش کے 6 ماہ بعد تک روزانہ فولاد کی گولیاں کھانی چاہئیں۔ انہوں نے بتایا کہ لیموں پانی خون بنانے والی فولاد کی گولیوں کو جسم میں اچھی طرح جذ ب کرنے میں مدد دیتا ہے۔انہوں نے بتایاکہ اس ضمن میں مزید معلومات، رہنمائی یا مشاورت کے لئے بی ایچ یوز، آر ایچ سیز، تحصیل و ڈسٹرکٹ ہیڈ کوارٹر ہسپتالوں، لیڈی ہیلتھ وزیٹرز اور لیڈی ہیلتھ ورکرز سے بھی معاونت حاصل کی جا سکتی ہے۔