aمحکمہ داخلہ سندھ کا کراچی کو محفوظ بنانے کا پلان

کراچی (اُردو پوائنٹ اخبارتازہ ترین - آن لائن۔ 27 مئی2024ء) وزیر داخلہ سندھ ضیاء الحسن لنجار نے کراچی کو محفوظ ترین شہر بنائے جانے کے حوالے سے سیف سٹی منصوبے کے آغاز سے متعلق پہلے مرحلے کو 12 ماہ میں پایہ تکمیل تک پہنچانے کی ہدایت جاری کرتے ہوئے کہا کہ سیف سٹی منصوبے کے مکمل ہونے سے ناصرف جرائم کی شرح میں بتدریج کمی آئیگی بلکہ جرائم کیخاتمے میں بھرپور مدد ملنے کیساتھ ساتھ ملوث عناصر کی بیخ کنی بھی ممکن ہوسکے گی۔

انہوں نے سیف سٹی منصوبہ کے دوسرے مرحلے کے بارے میں کہا کہ سیکنڈ فیز میں کراچی کو مکمل طور پر کور کرنیکے تمام تر ضروری اقدامات سے متعلق کاوشوں کو یقینی بنایا جائیگا بعدازاں کراچی کے بعد اس پروجیکٹ کے دائرے کو سندھ کے دیگر شہروں تک وسعت دینے کے مجموعی اقدامات کیئے جائیں گے۔

(جاری ہے)

وزیر داخلہ سندھ کا کہنا تھا کہ کوئی حکومت نہیں چاہتی کہ کرائم کی وارداتیں ہوں تاہم پیپلز پارٹی نے ہمیشہ برسراقتدار آتے ہی جرائم کے خلاف آہنی اقدامات کو اپنی تمام تر ترجیحات میں فوقیت دی ہے۔

ان کا کہنا تھا کہ حکومت سندھ کی سپورٹ اور معاونت کی چھتری تلے سندھ پولیس نے جو اقدامات کیئے ہیں ان کی بدولت امن وامان کی صورتحال میں بتدریج بہتری آرہی ہے میں یہ نہیں کہتا کہ صورتحال مکمل بہتر طور پر بہتر اور عوام کی امنگوں کے عین مطابق ہے تاہم گزشتہ کی نسبت اسوقت صورتحال بہتر ضرور ہوئی ہی. وزیر داخلہ سندھ نے مزید کہا کہ امن وامان کے استحکام اور اسے مفاد عامہ کے تقاضوں سے ہم آہنگ کرنیکے لیئے ہر سطح پر بھرپور کاوشیں کی جارہی ہیں اور سب سے بڑھ کر یہ جرائم کے خلاف میں اپنی پولیس کی کاکردگی سے مطمئن اور خوش ہوں۔