وفاقی وزیر مواصلات عبدالعلیم خان تاجکستان میں انٹرنیشنل ریجنل کانفرنس میں شرکت کریں گے

اسلام آباد(اُردو پوائنٹ اخبارتازہ ترین - این این آئی۔ 27 مئی2024ء) وفاقی وزیر مواصلات، نجکاری اور سرمایہ کاری بورڈ عبدالعلیم خان تاجکستان میںروڈ ٹو تیان شان کوریڈورکے تحت 29اور30مئی کو ہونے والی دو روزہ انٹرنیشنل ریجنل کانفرنس میں پاکستان کی نمائندگی کریں گے۔ وزارت مواصلات کی طرف سے جاری بیان کے مطابق 29اور30مئی کو ہونے والی اس عالمی علاقائی کانفرنس میں پاکستان کے علاوہ چین، بھارت ، آرمینیا، ایران، ترکی اور آذربائیجان کے ممالک کے مندوب شرکت کریں گے جبکہ عالمی مالیاتی اور سرمایہ کاری کے اہم اداروں کے سربراہان بھی اس اہم کانفرنس میں اپنے متعلقہ اداروں کی نمائندگی کریں گے۔

وفاقی وزیر مواصلات عبدالعلیم خان اس کانفرنس میں تاجکستان کے وزیر ٹرانسپورٹ عاظم ابراہیم کی دعوت پر اس کانفرنس میں شریک ہو رہے ہیں جس کا انعقاد وسط ایشیائی ممالک کے مابین 24ستمبر2023کو ہونے والے معاہدے کے تحت کیا جارہا ہے۔

(جاری ہے)

اس انٹرنیشنل ریجنل کانفرنس میں ایشیا اور یورپ سے وسطی ایشیا کی ریاستوں کوفاسٹ ٹریک سے منسلک کرنے کا نظام وضع کیا جائے گا اور مختلف ممالک کے درمیان شاہرات کی تعمیر اور تجارتی راہداریوں سے بندرگاہوں تک رسائی کیلئے گرینڈ چارٹر تشکیل دیا جائے گا جس میں پاکستان کو کلیدی اہمیت حاصل ہو گی۔

اس حوالے سے گفتگو کرتے ہوئے وفاقی وزیر مواصلات، نجکاری اور سرمایہ کاری بورڈ عبدالعلیم خان نے کہاکہ پاکستان پہلے ہی افغانستان اور چین کے راستے سے تاجکستان تک کے روڈ نیٹ ورک پر کام کر رہاہے اور آئندہ بھی ہم وسط ایشیائی ممالک کے لئے روڈ نیٹ ورک کے اشتراک میں مکمل تعاون کر ے گا۔انہوں نے کہا کہ نئی شاہراہوں کی تعمیر سے ہی تجارتی منڈیوں کے لئے راہداری اور بندرگاہوں تک رسائی ممکن ہو سکے گی اور ایسے عالمی منصوبے پاکستان سے تجارت کے فروغ کے علاوہ بین الملکی تعاون کا ذریعہ بنیں گے ۔

انہوں نے کہاکہ اس اقدام سے پاکستان میں سرمایہ کاری کے بھی نئے مواقع سامنے آئیں گے۔ عبدالعلیم خان نے کہا کہ پاکستان کو موجودہ حالات میں معیشت کے استحکام کے چیلنج کا سامنا ہے جس سے احسن انداز میں نبرد آزما ہونے کیلئے دیگر ممالک سے سڑکوں کے ذریعے منسلک ہونا سنگ میل ثابت ہو سکتا ہے۔