این اے 46 دھاندلی کیس:ریٹرننگ افسر کو فارم45،46،47 جمع کرانے کا حکم

قانون کے مطابق دیکھیں گے جو بھی ہوا فیصلہ کریں ،جسٹس طارق محمود جہانگیری کے ریمارکس

جمعرات 11 جولائی 2024 22:53

اسلام آباد(اُردو پوائنٹ اخبارتازہ ترین - آن لائن۔ 11 جولائی2024ء) الیکشن ٹریبیونل اسلام آباد نے این اے 46 دھاندلی کیس میں ریٹرننگ افسر کو فارم 45، 46، 47 جمع کرانے کا حکم دیا ہے۔جبکہ جسٹس طارق محمود جہانگیری نے ریمارکس دیئے کہ قانون کے مطابق دیکھیں گے جو بھی ہوا فیصلہ کریں گے۔الیکشن ٹریبونل جسٹس طارق محمود جہانگیری کے روبرو اسلام آباد کے حلقہ این اے 46 میں مبینہ دھاندلی کے خلاف پی ٹی آئی کے حمایت یافتہ امیدوار عامر مغل کی اپیل پر سماعت ہوئی، جس میں لیگی ایم این اے انجم عقیل خان اپنے وکیل کے ساتھ پیش ہوئے۔

دوران سماعت وکیل الیکشن کمیشن نے عدالت کو بتایا کہ پٹیشنز کی کاپیز نہیں ملیں، ہم نے فارم 45، 46، 47 جمع کرا دیئے ہیں، جس پر عدالت نے الیکشن کمیشن کو کاپیز کی فراہم کرنے کے لیے پٹیشنر کو ہدایت کردی۔

(جاری ہے)

ریٹرننگ افسر کے وکیل نے عدالت کو بتایا کہ مجھے گزشتہ روز پارٹی بنایا گیا ہے، کچھ وقت دے دیں جواب دے دوں گا ، جس پر عدالت نے ریٹرننگ افسر کو فارم 45 ، 46 ، 47 جمع کرانے کا حکم دے دیا۔

لیگی ایم این اے انجم عقیل خان کی جانب سے عدالت میں درخواست دائر کردی گئی، جس میں مؤقف اختیار کیاگیا کہ عامر مغل کی درخواست قابل سماعت نہیں کیونکہ تقاضے پورے نہیں کیے گئے۔ عدالت کی انجم عقیل خان کی درخواست پر عامر مغل کے وکیل کو جواب دینے کی ہدایت کی۔الیکشن ٹریبونل نے استفسار کیا کہ انجم عقیل خان کی جیت کا گزٹ نوٹیفکیشن کب کا ہے ، جس پر عامر مغل کے وکیل نے بتایا کہ 19 فروری کا نوٹیفکیشن ہے جب کہ الیکشن کمیشن کے وکیل نے بتایا کہ 13 فروری کا نوٹیفکیشن ہے۔

عامر مغل کی پٹیشن وقت گزرنے کے بعد دائر ہوئی ہے۔ اسلام آباد: ہائی کورٹ نے این اے 46 دھاندلی کیس میں ریٹرننگ افسر کو فارم 45، 46، 47 جمع کرانے کا حکم دیا ہے۔جسٹس طارق محمود جہانگیری نے ریمارکس دیے کہ قانون کے مطابق دیکھیں گے جو بھی ہوا فیصلہ کریں گے۔ بعد ازاں عدالت نے کیس کی مزید سماعت ملتوی کردی۔