محکمہ زراعت کی کپاس کی چنائی کے لئے ضروری سفارشات جاری

فیصل آباد (اُردو پوائنٹ اخبارتازہ ترین - اے پی پی۔ 29 اگست2024ء) محکمہ زراعت نے کپاس کی چنائی کیلئے ضروری سفارشات جاری کی ہیں اور کہا ہے کہ اعلیٰ معیار کی کپاس حاصل کرنے کیلئے چنائی اسوقت شروع کی جائے جب 40سے 50فیصد ٹینڈے پوری طرح پک کر کھل جائیں کیونکہ جلدی چنائی کرنے سے غیر معیاری اور کچا ریشہ حاصل ہوتا ہے اور ایسی روئی کی قیمت مقامی اور عالمی منڈی میں کم ہوجاتی ہے جبکہ چنائی شروع کرنے کا موزوں ترین وقت صبح اس وقت شروع ہوتا ہے جس وقت فصل اور ٹینڈوں پر سے رات کی شبنم خشک ہو جائے تاکہ کپاس بد رنگ نہ ہونے پائے اور نمی کی وجہ سے جننگ کے دوران مشکلات کا سامنا بھی نہ ہو البتہ اوس نہ پڑنے کی صورت میں چنائی صبح جلد شروع کی جا سکتی ہے۔

جامعہ زرعیہ فیصل آباد کے ماہرین زراعت نیکپاس کی چنائی کے وقت مردوں کو سگریٹ نوشی سے اجتناب اورخواتین کو سر کے بال سوتی کپڑے سے ڈھانپ کررکھنے کا مشورہ بھی دیاتاکہ کپاس کو آلودگی اورکسی بھی قسم کے نقصان سے بچایاجاسکے۔

(جاری ہے)

انہوں نے کہا کہ کاشتکار کپاس کی چنائی کے بعد ذخیرہ کے وقت نمی کاتناسب 10فیصد سے زیادہ نہ ہونے دیں۔انہوں نے کہا کہ کپاس پاکستان کی معیشت میں ریڑھ کی ہڈی کی حیثیت رکھتی ہے جس سے نہ صرف ملکی ٹیکسٹائل کی صنعت کا پہیہ رواں دواں رہتا ہے بلکہ اس کی برآمد سے زرمبادلہ بھی حاصل ہوتا ہے لیکن اگر کپاس آلودہ،ملاوٹ شدہ ہو تو نہ صرف مارکیٹ میں اس کی قیمت کم لگتی ہے بلکہ برآمد نہ ہونے کی وجہ سے ملکی سطح پر نقصان بھی اٹھانا پڑتا ہے۔

انہوں نے کہاکہ اسی ضرورت کے پیش نظر اور ملک میں کپاس کے اعلیٰ معیار کو برقرار رکھنے کیلئے کاشتکاروں کو چاہئے کہ وہ کپاس کی چنائی، ذخیرہ اور ترسیل کے موقع ماہرین زراعت کی سفارشات پر عمل کرتے ہوئے نہ صرف اپنی بلکہ ملکی آمدن میں بھی اضافہ کریں۔