میڈیکل اینڈ ڈینٹل کالجز میں داخلہ کیلئے یونیورسٹی آف سرگودہا میں قائم سنٹر پر امتحان کا انعقاد مکمل ، دو ہزار سے زائد طلبہ وطالبات کی شرکت

اتوار 22 ستمبر 2024 18:35

سرگودہا(اُردو پوائنٹ اخبارتازہ ترین - این این آئی۔ 22 ستمبر2024ء) سرگودھا میں ڈپٹی کمشنر اور ڈی پی او کی زیر نگرانی میڈیکل اینڈ ڈینٹل کالجز میں داخلہ کیلئے یونیورسٹی آف سرگودہا میں قائم سنٹر پر امتحان کا انعقاد مکمل کر لیا گیا۔زرائع کے مطابق ڈپٹی کمشنر کیپٹن ریٹائرڈ محمد وسیم اور ضلعی پولیس آفیسر ڈاکٹر اسد اعجاز ملہی کی زیر نگرانی میڈیکل اینڈ ڈینٹل کالجز میں داخلہ کے لئے یونیورسٹی آف سرگودھا میں قائم سنٹر پر اتوار کے روز ایم ڈی کیٹ ٹیسٹ کا انعقاد مکمل کر لیا گیا جس میں 2 ہزار 546 امیدواران میں 683 طلبہ اور ایک ہزار 863 طالبات نے شرکت کی۔

جن کی راہنمائی کے لیے ہپلپ سنٹرز بنائے گئے۔جہاں اے ڈی سی جی عمر فاروق کی قیادت میں عملہ معلومات فراہم کرتا رہا۔امتحان صبح 10 بجے شروع ہو کر دوپہر 1.30 تک جاری رہا۔

(جاری ہے)

جس میں طلبہ کے لیے شعبہ زیالوجی ،باٹنٹی اور انٹر نیشنل ریلیشنز بلاک میں امتحانی سنٹر اور طالبات کے لیے اکنامکس ، ایجوکیشن ،فزیالوجی ، ملک فیروز خان نون بزنس سکول اور کمپیوٹر سائنس بلاک میں سنٹرز بنائے گئے تھے۔

اں سنٹرز پر سیکورٹی کے فول پروف انتظامات کیے گئے جہاں ایلیٹ فورس اور خواتین پولیس کی بھاری نفری تعینات رہی۔ ٹریفک پولیس کا عملہ سنٹر کے اندر اور باہر ٹریفک کی روانی کو یقینی بنانے پر معمور رہا۔ پارکنگ کے بہترین انتظامات کیے گئے۔ اور امتحان کے اختتام پر طلبہ و طالبات کو پرامن انداز میں امتحانی سنٹر سے گھروں کو روانہ کیا گیا۔