سنی اتحاد کونسل کے ایم این اے سہیل سلطان کیخلاف ریفرنس اسپیکر کو موصول

پیر 7 اکتوبر 2024 19:40

اسلام آباد (اُردو پوائنٹ اخبارتازہ ترین - این این آئی۔ 07 اکتوبر2024ء) اسپیکر قومی اسمبلی کو ایم این اے سہیل سلطان کے خلاف ریفرنسں موصول ہوگیا۔ سہیل سلطان این اے 4 سوات سے سنی اتحاد کونسل کے ایم این اے ہیں۔ ذرائع کے مطابق ریفرنس سوات کے شہری نصراللّٰہ خان کی طرف سے جمع کرایا گیاجس میں کہا گیا کہ سہیل سلطان نے اپنی سرکاری ملازمت پر الیکشن کمیشن میں جھوٹ بولا۔

(جاری ہے)

ذرائع کے مطابق ریفرنس میں کہا گیا کہ سہیل سلطان الیکشن سے پہلے بطور ڈپٹی اٹارنی جنرل خیبر پختونخوا کام کرتے رہے۔ کوئی سرکاری ملازم ملازمت کے ختم ہونے کے دو سال بعد تک الیکشن نہیں لڑسکتا۔ ذرائع کے مطابق درخواست گزار نے اسپیکر کو ریفرنس الیکشن کمیشن کو بھیجنے کی استدعا کی ہے۔ درخواست گزار کے مطابق ریفرنس پر فوری کارروائی کرکے متعلقہ ممبر کو نااہل قرار دیا جائے۔ ذرائع کے مطابق اسپیکر نے سہیل سلطان کو نااہل قرار دینے کیلئے الیکشن کمیشن کو خط لکھ دیا۔