بھارتی حکومت کشمیری مسلمانوں کے دینی جذبات کو دانستہ طو ر پر ٹھیس پہنچا رہی ہے، حریت رہنما

جمعہ 10 جنوری 2025 22:00

سرینگر (اُردو پوائنٹ اخبارتازہ ترین - اے پی پی۔ 10 جنوری2025ء) بھارت کے غیر قانونی زیر قبضہ جموں و کشمیر میں کل جماعتی حریت کانفرنس کی اکائی تنظیموں اور رہنمائوں نے بھارتی فوجیوں کے ہاتھوں سینٹرل جیل سری نگر میں قرآن پاک کی بے حرمتی کے حالیہ واقعے کی شدید مذمت کرتے ہوئے اسے کشمیری مسلمانوں کے دینی جذبات کو محروج کرنے کا ایک دانستہ فعل قرار دیا ہے۔

کشمیر میڈیا سروس کے مطابق کل جماعتی حریت کانفرنس کے سینئر رہنما اور انجمن شرعی شیعیان کے صدر آغا سید حسن الموسوی الصفوی نے بڈگام میں ایک اجتماع سے خطاب کرتے ہوئے اس گھناؤنے فعل پر اپنے شدید غم و غصے کا اظہار کیا۔ انہوں نے کہا کہ اس طرح کی اہانت آمیز کارروائیاں قابض حکام کی اسلامو فوبک پالیسیوں کی وجہ سے رونما ہوتی ہیں۔

(جاری ہے)

۔ انہوں نے کہا کہ بے حرمتی کی یہ کارروائیاں مقتدر حلقوں کی براہ راست نگرانی میں ہوتی ہیں۔

دیگر حریت رہنماؤں اور تنظیموں فیاض حسین جعفری، سید سبط شبیر قمی، جموں کشمیر ڈیموکریٹک فریڈم پارٹی، تحریک حریت جموں کشمیر اور علماءکونسل نے بھی اپنے بیانات میں اس گستاخانہ فعل کی شدید مذمت کی ہے۔ انہوں نے دو ٹوک الفاظ میں کہا کہ اس طرح کی مذموم حرکتیں کسی صورت برداشت نہیں کی جائیں گی۔ان کا کہنا تھا کہ بی جے پی کی زیر قیادت بھارت کی ہندوتوا بھارتی حکومت جان بوجھ کر کشمیری مسلمانوں کے مذہبی جذبات کو ٹھیس پہنچا رہی ہے۔

انہوں نے کہا کہ بھارتی حکومت منظم طریقے سے کشمیریوں کے مذہبی جذبات کو بھڑکانے اور مجروح کرنے کے لیے اس طرح کی کارروائیوں کو ہتھیار کے طور پر استعمال کر رہی ہے۔انہوں نے عالمی برادری سے مطالبہ کیا کہ وہ بھارت کو مذہبی اقلیتوں پر حملوں سے روکے۔