سگریڈ کاگ مشرق وسطیٰ میں عبوری یو این رابطہ کار مقرر

یو این ہفتہ 18 جنوری 2025 05:00

اسلام آباد (اُردو پوائنٹ ۔ UN اردو۔ 18 جنوری 2025ء) اقوام متحدہ کے سیکرٹری جنرل انتونیو گوتیرش نے نیدرلینڈز کی سابق وزیر خارجہ سگریڈ کاگ کو مشرق وسطیٰ امن عمل کے لیے عبوری طور پر ادارے کی خصوصی رابطہ کار اور فلسطینی تنظیم آزادی (پی ایل او) اور فلسطینی اتھارٹی کے لیے اپنی ذاتی نمائندہ مقرر کرنے کا اعلان کیا ہے۔

سگریڈ کاگ مشرق وسطیٰ امن عمل کے لیے اقوام متحدہ کے سبکدوش ہونے والے رابطہ کار ٹور وینزلینڈ کی جگہ لیں گی۔

سیکرٹری جنرل نے ٹور وینزلینڈ کی لگن اور قیادت پر ممنونیت کا اظہار کرتے ہوئے کہا ہے کہ انہوں نے مشکل حالات میں بہترین کام کیا۔

سیکرٹری جنرل کے ترجمان کی جانب سے جاری کردہ بیان میں بتایا گیا ہے کہ سگریڈ کاگ غزہ میں امداد فراہم کرنے اور تعمیرنو کے اقدامات کی رابطہ کار کے طور پر اپنی موجودہ ذمہ داریوں کی انجام دہی بھی جاری رکھیں گی۔

(جاری ہے)

انہیں یہ کام اقوام متحدہ کی سلامتی کونسل کی قرارداد (2720) کے تحت سونپا گیا تھا۔

وسیع سیاسی و سفارتی تجربہ

سگریڈ کاگ سیاست، انسانی امداد، ترقیاتی امور اور سفارت کاری کا وسیع تجربہ رکھتی ہیں۔

وہ جنوری 2022 سے دسمبر 2023 تک نیدرلینڈز کی حکومت میں نائب وزیراعظم اول اور پہلی خاتون وزیر خزانہ کی حیثیت سے خدمات انجام دے چکی ہیں۔

اس سے پہلے اکتوبر 2017 سے مئی 2021 تک انہوں نے تجارت و ترقیاتی تعاون اور اس کے بعد امور خارجہ کی وزیر کی حیثیت سے کام کیا تھا۔

سگریڈ کاگ 2015 سے 2017 تک لبنان کے لیے اقوام متحدہ کی خصوصی رابطہ کار بھی رہ چکی ہیں۔ اس سے پہلے انہوں نے کیمیائی ہتھیاروں کے امتناع کے ادارے کے مشترکہ مشن (او پی سی ڈبلیو) کی خصوصی رابطہ کار اور شام میں اقوام متحدہ کی نمائندہ کے طور پر ذمہ داریاں نبھائیں۔

2010 سے 2013 تک انہوں نے اقوام متحدہ کے ترقیاتی پروگرام کے لیے معاون سیکرٹری جنرل کی حیثیت سے کام کیا اور 2007 سے 2010 تک مشرق وسطیٰ اور شمالی افریقہ کے لیے یونیسف کی ریجنل ڈائریکٹر رہیں۔

کئی زبانوں میں مہارت

سگریڈ کاگ اس سے پہلے یونیسف، عالمی ادارہ برائے مہاجرت (آئی او ایم) اور فلسطینی پناہ گزینوں کے لیے اقوام متحدہ کے ادارے (انروا) میں کئی اعلیٰ سطحی عہدوں پر خدمات انجام دیتی چلی آئی تھیں۔

انہوں نے برطانیہ کی یونیورسٹی آف ایگزیٹر سے مطالعہ مشرق وسطیٰ میں ماسٹر آف آرٹ، آکسفورڈ یونیورسٹی سے بین الاقوامی تعلقات میں ماسٹر آف فلاسفی اور مصر کے دارالحکومت قاہرہ کی امریکن یونیورسٹی سے مطالعہ مشرق وسطیٰ میں بیچلر آف آرٹس کی ڈگری حاصل کر رکھی ہے۔ وہ ولندیزی، جرمن، فرانسیسی، انگریزی، ہسپانوی اور عربی زبان میں مہارت رکھتی ہیں۔