کراچی،کورنگی چمڑا چورنگی پر سیلانی جاب فیئر ،سیکڑوں بے روزگاروں نے رجوع کیا

بے روزگاروں کو ملازمت کی پیشکش،25 افراد کو اسی وقت ملازمت مل گئی ،مزید چار جاب فیئر کا اعلان

ہفتہ 18 جنوری 2025 21:30

کراچی(اُردو پوائنٹ اخبارتازہ ترین - این این آئی۔ 18 جنوری2025ء)کورنگی چمڑا چورنگی پر سیلانی جاب فیئر کا انعقاد،سیکڑوں بے روزگاروں نے رجوع کیا،نوجوانوں کی بڑی تعداد نے اپنی دستاویزات جمع کرائیں اور انٹرویو میںپیش ہوئے۔جاب فیئر میں ایک روز میں170 بے روزگار افراد کو ملازمت کی پیشکش کردی گئی جبکہ 25 افراد کو موقع پر ہی ملازمت دے دی گئی ۔تفصیلات کے مطابق سیلانی ویلفیئر انٹرنیشنل ٹرسٹ کے تحت بے روزگار افراد کو روزگار کی فراہمی کے لیے سیلانی اسمارٹ جاب فیئر کا آغاز ہوگیا۔

ہفتے کو چمڑا چورنگی کورنگی انڈسٹریل ایریا میںپہلی جاب فیئر منعقد کی گئی۔جاب فیئر میںآٹھ نجی کمپنیوں نے اپنے اسٹال لگائے ۔ 550 بے روزگاروں نے رجوع کیا ، 170 نوجوانوں کو مختلف کمپنیز نے انٹرویو کے بعد ملازمت کی پیشکش کردی جبکہ تمام رسمی کارروائی مکمل کرنے والے 25 افراد کو فوری طور پر روزگار فراہم کردیا گیا۔

(جاری ہے)

سیلانی ویلفیئر سے جاری کردہ اعلامیہ کے مطابق ہفتہ 25 جنوری کو دوسری جاب فیئر میلینیم مال برانچ پر ، تیسری جاب فیئر یکم فروری کو سیمنس چورنگی سائٹ ایریا،چوتھی جاب فیئر 8 فروری کو قیوم آباد اور پانچویں جاب فیئر 15 فروری کو ملیر ہالٹ برانچ پر منعقد ہوگی۔

ان جاب فیئر میں بھی مختلف کمپنیز اپنے اسٹال لگائیں گی اور معیار پر پورا اترنے والوں کو روزگار کی پیشکش کی جائے گی۔