وزیراعظم کا وفاقی کابینہ میں شامل ارکان کی کارکردگی کا جائزہ لینے کا فیصلہ

شہباز شریف نے وزارتوں اور محکموں کی کارکردگی رپورٹ طلب کرلی جس کا وہ خود جائزہ لیں گے

Sajid Ali ساجد علی اتوار 2 فروری 2025 11:29

وزیراعظم کا وفاقی کابینہ میں شامل ارکان کی کارکردگی کا جائزہ لینے کا ..
اسلام آباد ( اُردو پوائنٹ اخبارتازہ ترین۔ 02 فروری 2025ء ) وزیراعظم شہباز شریف نے حکومت کا ایک سال مکمل ہونے پر کابینہ میں شامل ارکان کی کارکردگی کا جائزہ لینے کا فیصلہ کرلیا۔ میڈیا رپورٹس کے مطابق ذرائع کا کہنا ہے کہ وزیراعظم شہباز شریف نے وزارتوں اور محکموں کی کارکردگی رپورٹ طلب کی ہے جس کا وہ خود جائزہ لیں گے، کارکردگی رپورٹ بھجوانے کیلئے انہوں نے تمام وزارتوں کو ایک ہدایت نامہ ارسال کردیا ہے، جس میں شہباز شریف نے گزشتہ ایک سال میں ہونے والی اصلاحات پر عملدرآمد رپورٹ طلب کی ہے، اس کے علاوہ ایک سال کے دوران دی جانے والی نوکریوں کی تفصیلات بھی مانگی گئی ہیں۔

اس حوالے سے بھیجے جانے والے مراسلے میں کہا گیا ہے کہ وزارتوں اور اداروں کی 12 ماہ میں اصلاحات کی تفصیلات فراہم کی جائیں، پالیسی تبدیلی، ڈھانچہ جاتی ایڈجسٹمنٹ اور گورننس میں اضافے پر بریفنگ دی جائے، سرکاری اداروں میں اصلاحات لانے میں کتنی کامیابی ملی وزارتیں اس کا جواب دیں گی، وفاقی حکومت اس سال 1 لاکھ 50 ہزار خالی سیٹوں کو ختم کردے گی، سرکاری محکموں میں ڈیلی ویجز کی سیٹیں بھی ختم کر دی جائیں گی اس سے متعلق پیشرفت سے بھی آگاہ کیا جائے۔

(جاری ہے)

بتایا جارہا ہے کہ وزیر اعظم شہباز شریف نے ارکان پارلیمنٹ کی تنخواہوں میں اضافے کی منظوری دے دی ہے جس کا اطلاق یکم جنوری 2025ء سے کر دیا گیا، تنخواہوں میں اضافے کی منظوری کے بعد ایک رکن پارلیمنٹ کے اکاؤنٹ میں 5 لاکھ 19 ہزار روپے منتقل کردیئے گئے، سپیکر قومی اسمبلی ایاز صادق کی تنخواہ میں اضافہ نہیں ہوا لہٰذا وہ 2 لاکھ 18 ہزار روپے وصول کریں گے، اسی طرح ڈپٹی سپیکر قومی اسمبلی کی تنخواہ میں بھی اضافہ نہیں کیا گیا کیوں کہ سپیکر اور ڈپٹی سپیکر کی تنخواہ فنانس کمیٹی نہیں بڑھا سکتی۔