سعودی اور جاپانی وزرائے خارجہ کی سٹرٹیجک ڈائیلاگ اجلاس میں شرکت

منگل 4 فروری 2025 17:01

ٹوکیو (اُردو پوائنٹ اخبارتازہ ترین - این این آئی۔ 04 فروری2025ء)سعودی عرب کے وزیرخارجہ شہزادہ فیصل بن فرحان اور ان کے جاپانی ہم منصب ایویا تاکیشی نے ٹوکیو میں سٹریٹجک ڈائیلاگ کے دوسرے اجلاس کی صدارت کی ،دونوں رہنمائوں نے تعاون اور بہتر مستقبل کیلیے مل کر کام کرنے کے حوالے سے تبادلہ خیال بھی کیا۔ عرب ٹی وی کے مطابق سعودی وزیرخارجہ شہزادہ فیصل بن فرحان نے کہاکہ اوساکا ایکسپو 2025 جاپان اور سعودی عرب کے درمیان تعاون کو مستحکم کرنے کا اہم موقع ہے۔

دونوں رہنمائوں نے مختلف سطحوں پر ہم آہنگی اور تعاون جاری رکھنے کی اہمیت پر زور دیا ۔شہزادہ فیصل بن فرحان نے دونوں ملکوں کے درمیان دیرینہ تعلقات کا ذکر کرتے ہوئے کہا کہ اس سال دونوں ملکوں کے سفارتی تعلقات کی 70 ویں سالگرہ ہے۔

(جاری ہے)

بعد ازاں وزرائے خارجہ نے سٹریٹجک پارٹنر شپ کونسل کے قیام اور دونوں ملکوں کے سفارتکاروں اور حکام کے لیے مختصر مدت کے ویزے سے استثنی سے متعلق مفاہمتی یادداشت پر دستخط کئے ۔

جاپانی وزیر خارجہ ایویا تاکیشی نے کہاکہ جاپان مشرق وسطی میں امن و استحکام کے حصول میں مدد کے لیے سعودی عرب کے ساتھ مل کر کام کرنا چاہتا ہے۔اس موقع پر جاپان میں سعودی سفیر ڈاکٹر غازی بن فیصل بن زقر، ایشیائی ملکوں کی جنرل ایڈمنسٹریشن کے ڈائریکٹر جنرل ناصر الغنوم اور وزیرخارجہ کے دفتر کے اسسٹنٹ ڈائریکٹر جنرل ولید الاسماعیل نے بھی شرکت کی۔