آن لائن پیمنٹ مزید آسان، پاکستان میں ڈیجیٹل ادائیگیوں کی سہولت گوگل والٹ متعارف کرادی گئی

صارفین ایپلی کیشن کو پلے اسٹورز سے ڈاؤن لوڈ کر سکتے ہیں، یہ سہولت ملک میں ڈیجیٹل بینکنگ اور الیکٹرانک ادائیگیوں کے فروغ میں اہم سنگ میل ثابت ہوگی

ساجد علی جمعرات 13 مارچ 2025 11:12

آن لائن پیمنٹ مزید آسان، پاکستان میں ڈیجیٹل ادائیگیوں کی سہولت گوگل ..

اسلام آباد ( اُردو پوائنٹ اخبارتازہ ترین۔ 13 مارچ 2025ء ) دنیا کی معروف کمپنی گوگل نے پاکستان میں ڈیجیٹل ادائیگیوں کی سہولت گوگل والٹ متعارف کرا دی، ابتدائی مرحلے میں بینک الفلاح، بینک آف پنجاب، فیصل بینک، جاز کیش، ایچ بی ایل، میزان بینک اور یو بی ایل کے کارڈ ہولڈرز اپنے کارڈز کو گوگل والٹ میں شامل کرسکتے ہیں۔ تفصیلات کے مطابق گوگل والٹ دراصل ایک ڈیجیٹل بٹوا یا پرس ہے جس میں ہر صارف مختلف کارڈز اور دستاویزات بھی محفوظ کر سکتا ہے، ویزا اور ماسٹر کارڈ کے حامل صارفین اپنے بینک کارڈز کو گوگل والٹ میں شامل کر سکتے ہیں، یہ سہولت ڈیجیٹل بینکنگ اور الیکٹرانک ادائیگیوں کے فروغ میں اہم سنگ میل ثابت ہوگی۔

اس حوالے سے گوگل پاکستان کے کنٹری ڈائریکٹر فرحان قریشی کا کہنا ہے کہ گوگل والٹ صارفین کو محفوظ، آسان اور مفید ڈیجیٹل ادائیگیوں کے ساتھ ساتھ بورڈنگ پاسز، لائلٹی کارڈز، اہم اشیاء کی رسائی اور دیگر کارڈز کو ذخیرہ کرنے کی سہولت فراہم کرے گی، گوگل والٹ کا آغاز پاکستان میں ڈیجیٹل ادائیگیوں کو فروغ دینے کی ہماری کوششوں کا حصہ ہے، اس سے صارفین کو محفوظ اور تیز تر ادائیگی کا موقع ملے گا۔

(جاری ہے)

انہوں نے کہا کہ پاکستان میں ڈیجیٹل ادائیگیوں کا شعبہ تیزی سے ترقی کر رہا ہے، گوگل والٹ ایک محفوظ، آسان اور مؤثر طریقہ فراہم کرتا ہے جس کے ذریعے صارفین ادائیگیاں کر سکتے ہیں، خریداری کر سکتے ہیں اور سفر کو مزید آسان بنا سکتے ہیں، صارفین ایپلی کیشن کو پلے اسٹورز سے ڈاؤن لوڈ کر سکتے ہیں، گوگل والٹ دراصل ایک ڈیجیٹل بٹوا یا پرس ہے، جس میں ہر صارف مختلف کارڈز اور دستاویزات بھی محفوظ کر سکتا ہے، اگر کوئی اس ڈیٹا تک رسائی حاصل کربھی لے تو وہ اس کے کسی کام کا نہیں ہوتا کیونکہ اس میں ڈیبٹ یا کریڈٹ کی تفصیلات موجود نہیں ہوتیں۔