گورنمنٹ ہائی سکول بھاگ میں اسسٹنٹ کمشنر بھاگ نوید احمد بلوچ کی زیر صدارت امن و امان کی بحالی کے لیے اہم امن جرگہ

بھاگ(اُردو پوائنٹ اخبارتازہ ترین - آن لائن۔ 22 مارچ2025ء)گورنمنٹ ہائی سکول بھاگ میں اسسٹنٹ کمشنر بھاگ نوید احمد بلوچ کی زیر صدارت امن و امان کی بحالی کے لیے ایک اہم امن جرگہ منعقد کیا گیا۔ جرگے میں ایف سی 52 ونگ کے کیپٹن عبدالقدوس، ڈی ایس پی بھاگ جان محمد کھوسہ، چیئرمین میونسپل کمیٹی مفتی کفایت اللہ، معروف قبائلی شخصیت ارباب قادر بخش ایری، میر اسماعیل خان چھلگری، حاجی محمد الیاس کلواڑ، ایڈیشنل ایس ایچ او غلام مصطفی، لیویز رسالدار حفیظ ابڑو، نیشنل پارٹی کے رہنما غنی بلوچ، وفا مراد سومرو، جاموٹ قومی موومنٹ کے رہنما کامریڈ نور احمد جاموٹ، جمیعت علما اسلام کے تحصیل امیر مولانا محمد یوسف گویا، بولان یوتھ اتحاد کے چیئرمین غلام حسین بلوچ، وڈیرہ سلیم جتوئی، تحریک انصاف کے رہنما علی احمد مستوئی، ایکشن کمیٹی بھاگ کے جنرل سیکرٹری حافظ اصغر علی، تحریک لبیک کے رہنما محمد بخش مغیری، کامریڈ فیاض احمد جاموٹ، کامریڈ ٹکا خان کلواڑ، سید صابر شاہ، کامریڈ نعیم آزاد، اقلیتی رہنما گیلا رام گیان چند اور صحافی حضرات نے بڑی تعداد میں شرکت کی۔

(جاری ہے)

اس موقع پر شرکا نے بھاگ میں امن و امان کی مخدوش صورتحال پر شدید غم و غصے کا اظہار کرتے ہوئے کہا کہ شہر اور تحصیل بھر میں چور اور ڈاکو بلا خوف و خطر دندناتے پھر رہے ہیں۔ دن دہاڑے چوری اور ڈکیتی کی وارداتیں عام ہو چکی ہیں، جبکہ لیویز اور پولیس مکمل طور پر بے بس نظر آ رہی ہیں۔ شہریوں نے شکایت کی کہ ہر بار جرگے منعقد کیے جاتے ہیں، لیکن عملی اقدامات نہ ہونے کے باعث عوام عدم تحفظ کا شکار ہیں۔

جرگے کے شرکا نے کہا کہ خراب حالات کے باعث لوگ ذہنی پریشانی میں مبتلا ہو چکے ہیں اور نقل مکانی پر مجبور ہو رہے ہیں۔اسسٹنٹ کمشنر بھاگ نوید احمد بلوچ، ایف سی 52 ونگ کے کیپٹن عبدالقدوس اور ڈی ایس پی بھاگ جان محمد کھوسہ نے شرکا سے خطاب کرتے ہوئے کہا کہ امن و امان کی بحالی کے لیے تمام وسائل بروئے کار لائے جائیں گے۔ انہوں نے یقین دہانی کرائی کہ شہریوں کے تحفظ کو اولین ترجیح دی جائے گی۔ عید کی آمد کے پیش نظر چوری اور ڈکیتی کی وارداتوں کی روک تھام کے لیے بازاروں اور شہر کے داخلی و خارجی راستوں پر سیکیورٹی اہلکار تعینات کیے جائیں گے، جبکہ تحصیل بھر میں گشت کا عمل بھی تیز کیا جائے گا۔