جی میل نے بھی اپنا اے آئی ٹول متعارف کرا دیا

صارفین کو پرانی ای میلز جلد تلاش کرنے میں معاونت فراہم کرے گا

اتوار 23 مارچ 2025 13:55

جی میل نے بھی اپنا اے آئی ٹول متعارف کرا دیا

کراچی(اُردو پوائنٹ اخبارتازہ ترین - این این آئی۔ 23 مارچ2025ء) انٹرنیٹ ٹیکنالوجی کمپنی گوگل نے بھی اپنی ای میل سروس جی میل کے لیے آرٹیفیشل انٹیلی جنس (اے آئی)کا مزید ایک نیا ٹول متعارف کرا دیا۔رپورٹ کے مطابق گوگل نے اپنے بیان میں کہا ہے کہ جی میل میں پرانی اور مطلوبہ ای میلز کو جلد اور بہتر انداز میں تلاش کرنے کا اے آئی فیچر پیش کردیا گیا۔

اے آئی فیچر صارفین کو پرانی ای میلز جلد تلاش کرنے میں معاونت فراہم کرے گا۔یہ نیا فیچر نہ صرف صارف کو پرانی مطلوبہ ای میلز تلاش کرنے میں مدد فراہم کرے گا۔ بلکہ وہ ملتی جلتی ای میلز بھی صارف کو تلاش کر کے دے گا۔علاوہ ازیں اے آئی ٹول تلاش کیے گئے الفاظ پر نظر رکھتے ہوئے نہ صرف پرانی ای میلز کے نتائج فراہم کرے گا۔ بلکہ کسی بھی ادارے یا شخص کی جانب سے آنے والی یا انہیں بھیجی جانے والی ای میلز کے نتائج بھی فراہم کرے گا۔

(جاری ہے)

گوگل کی جانب سے بتایا گیا کہ جی میل کے اے آئی فیچر پر فوری طور پر تمام صارفین کو رسائی حاصل نہیں ہو گی۔ تاہم آنے والے دنوں میں تمام جی میل صارفین کو اے آئی سرچ ٹول تک رسائی دے دی جائے گی۔مذکورہ ٹول سے قبل بھی جی میل نے ای میل میں میل لکھنے میں مدد دینے کا جیمنائی اے آئی ٹول پیش کیا تھا۔ علاوہ ازیں جی میل میں متعدد اے آئی ٹولز پیش کیے جا چکے ہیں۔